Koreı teatrynyń torqaly toıy

Ǵasyrǵa jýyq jóńkilgen ýaqyttyń seksen bes jyly jan-júregin aıqara ashyp, baýyryna basqan qazaq eline tıesili. Qurylǵan kúninen bastap koreı halqynyń ómirimen tyǵyz baılanysty tirshilik keship kele jatqan ­teatr Qazaqstanda ómir súretin bar­lyq koreılerdiń basyn qosyp, tili men dilin umyttyrmaı, óneri men dástúrin uıystyratyn iri ortalyq retinde Ota­ny­myzdyń kópultty mádenıetiniń bó­linbes bir bólshegine aınalyp ketken.

Respýblıkadaǵy eń ozyq shyǵarma­shylyq ujymdardyń ortasynda óz orny bar Memlekettik akademııalyq koreı mýzykalyq teatrynyń saltanat­ty jıyny úsh tilde – qazaq, koreı jáne orys tilderinde júrgizilgeni, ási­rese júrgizýshiler men shaqyrylǵan qonaq­tardyń qazaq jáne koreı tilderine ba­sym­dyq bere sóılegeni teatrdyń mem­le­kettik til saıasatyn damytýǵa nem­quraıdy qaramaıtynyn, qazaq tilin shynaıy qadir tutatynyn baıqatady. Teatr ártisteri­niń deni memlekettik tildi erkin meńger­gen, al júrgizýshi Sergeıdiń tili tipti jatyq. Teatrdy mereıtoıymen quttyqtap kelgen qonaqtar da aq tilegin múmkindiginshe qazaq tilinde aqtaryp, koreı men qazaq eliniń týystyǵyn osy óristen taýyp, tarqatyp jatty.

Mádenıet jáne sport mınıstrligi Mádenıet komıteti tóraǵasynyń orynbasary Danııar Álıev teatrdyń torqa­ly toqsan jyldyq toıyna tartý retinde birqatar ártister men qyzmetkerler­di tós­belgimen marapattady. Mádenıet sala­synyń damýyna erekshe úles qosqan eńbegi úshin «Mádenıet salasynyń úz­digi» tósbelgisimen Sergeı Kım, al qur­met gra­matosymen PhD, halyq­aralyq baı­qaýlardyń laýreaty Anna Soı, Ro­man Soı, Anastasııa Soı, Super star KZ baı­qaýynyń qaty­­sýshysy, I m singer Kazakstan baı­qaýynyń jeńimpazy Roman Kım, teatr­dyń jetekshi ártisi Natalıa Lı marapat­talsa, mınıstrliktiń Alǵys haty teatr­dyń bas baletmeısteri Larısa Kım, Qa­zaq­stannyń eńbek sińirgen ártisi Zoıa Kım, teatr ártisteri Eńlik Áshimova, Kon­­­stan­tın Pak, Evgenııa Iýnǵa tapsyryldy.

Almaty qalalyq mádenıet basqar­masynyń ókili Maqsat Jaıyqov, Qazaq­stan halqy Assambleıasy Sekretarıaty etnosaralyq qatynastardy damytý bó­li­miniń jáne Almaty qalasy Qo­ǵam­dyq damý basqarmasynyń basshy­sy Nazar Balǵymbaev quttyqtap, Qazaq­stan má­de­nıetin baıytyp, ónerin túr­len­dirý jolynda ólsheýsiz eńbek sińi­rip kele jat­qan Koreı teatrynyń osy sa­la­daǵy ja­ńashyldyq pen zamanaýı izde­nis jo­­lyndaǵy maqsatyn jan-jaq­ty atap ótti. Qazaqstandaǵy koreı qaýym­das­tyǵynyń tóraǵasy Iýrıı Shın teatr ártisteri Angelına Iýgaı men Baq­tııar­ Razıevke Kım Dın atyndaǵy syı­aqy­ny tabys­tady. Sondaı-aq saltanatty jıyn­ǵa Koreıa Respýblıkasynyń Qazaq­stan Respýblıkasyndaǵy Bas kon­sý­ly­ Pak Ne Chhon arnaıy kelip qa­tysty. «Qa­zaqstandaǵy Koreı memle­ket­tik aka­demııalyq drama teatry tarı­hı otany­nan jyraqta ómir súretin ko­reı­lerdiń tilin, tarıhyn, dástúrin saq­taý jolynda aýqym­dy is atqaryp otyr­ǵan kúlli álem­degi biregeı mańyzy bar teatr. Toq­san jyldyq tarıhynda teatr óz eli­niń, alys-jaqyn postkeńes­tik­ elderdiń kórer­men­derine kásibı she­ber­­liktiń úlgisin kór­setip qoımaı, halyq­aralyq óner alań­darynyń bıik baǵasy men aýqymdy báıge­lerdiń marapatyna ıe boldy. Osy teatr­dyń arqasynda Qazaqstandaǵy jáne Ortalyq Azııadaǵy koreıler ult­tyq bi­re­geıligi men bet-beınesin saqtaı aldy. Koreı teatrynyń damýy úshin úzdik­siz qoldaý kórsetip kele jatqan Qazaq­stan Respýblıkasynyń Úkimetine alǵys bil­diremin», dedi Bas konsýl Pak Ne Chhon.

Táýelsizdiktiń alǵashqy jylda­ryn­da teatr men sahnany saqtaý jolyn­da­ǵy taýqymetke tótep berip, Koreı teatry­nyń órkendeýi úshin aıanbaı ter tógip, otyz jylǵa jýyq dırektor bol­ǵan Lıýbov Nı uzaq jyldar boıy Qazaqstandaǵy koreı mádenıetiniń damýy úshin óner osha­ǵyna demeýshilik jasap, qoldap kelgen dıaspora ókilderine, zııaly qaýymǵa, kásipkerler men jaı ǵana qarapaıym janashyr azamattarǵa alǵysyn bildir­di. Saltanatty jıynnyń resmı bólimi aıaqtalǵan soń mereıtoı meımandary men kórermender «Bizge 90!» spektakl-konsertin tamashalady. Basty keıipker Fleıtashy teatr jaı­ly, onyń qyzyqty da qıyn uzaq tarı­hy týraly syr shertip, teatr qyzmet­ker­leriniń, ­koreı ­teatryn­da aty qalǵan belgili tul­ǵa­lardyń ómir joly men jetistigi jaı­ly baıandady.

Tarıhı otanynan basqa álemniń bir­de-bir elinde balamasy joq, tek qazaq jerinde kóktep, órken jaıyp, jeke otaý bolyp otyrǵan Koreı teatry – óz hal­qy­nyń qymbat qazynasy, maq­tanyshy jáne ultynyń baılyǵy. Kórnekti teatr qaıratkerleriniń shy­ǵar­ma­shylyq she­ber­liginiń negizinde shyń­dalyp, keıin­gi birneshe býyn talantty shákirtterdiń óne­rimen óz ornyn aıshyq­taǵan teatrdyń tarıhy Qazaqstan koreı­leriniń ómiri­men bite qaınasyp, bir­tutas tarıh paraqtaryn tolyqtyra bermek.

ALMATY