Qańtar oqıǵasynan keıin beti ashylǵan keleńsizdikterdi eńserý, aldaǵy ýaqytta ádiletsizdikterge jol bermeý, qoǵamdy jańartý, bıliktiń halyqqa esepti bolýyn qamtamasyz etý – Qazaqstan halqynyń basty talaby. Bul týraly halyq óz pikirin ashyq aıtýda.
Prezıdent saılaýy – demokratııany damytýǵa, memlekettik ınstıtýttardy nyǵaıtýǵa, jergilikti ózin-ózi basqarýdy kúsheıtýge, sol arqyly tolyqqandy halyqtyq bılik organdaryn qalyptastyrýǵa baǵyttalǵan qadamdardyń basynda tur dep túsinemin. Biz halyq bıligin ornatýdy demokratııalyq jolmen qamtamasyz etýge tıispiz. Bul oraıda, saılaýshylardyń aldaǵy ótetin saılaýlardyń bárine jaýapkershilikpen, saýattylyqpen qaraǵany abzal. О́ıtkeni álemniń qarqyndy ıntegrasııalanýy, kún saıyn kúrdelene túsken geosaıası jaǵdaılar, ekonomıkalyq úderister, ishki, syrtqy saıası ahýal sekildi mańyzdy faktorlardy nazarǵa almaý múmkin emes.
Keshe ǵana ótken dástúrli jáne álemdik dinder lıderleriniń sezinde Izraıldiń ravvıni árbir evreıdiń óziniń tańǵy duǵasynda Jaratýshydan suraıtyn eki máselesin aıtqany eske túsip otyr. Onyń birinshisi – ár evreı azamaty Izraılge jaqsylyq suraıdy, ekinshisi búgin kezdesken adamynyń jaqsy jaqtaryn kórsetýdi suraıdy. Qazir bizdiń elimiz úshin, jalǵyz Otanymyz – Qazaqstan úshin osyndaı tilekterdi tileıtin, nıetti túzeıtin, jańarýǵa úles qosatyn ýaqyt dep sanaımyn. Men Qazaqstannyń jańarý ıdeıasyna senemin.
Prezıdent saılaýy elimizde saılaý paradıgmasyn jaqsartýdy, onyń ashyqtyǵy men saılaý úderisine halyqtyń senimin qamtamasyz etýge tıis dep oılaımyn. Bul saılaýda saılaýshylar oı-pikirin ashyq aıtady, óz tańdaýlaryn jasaýyna eshkim tosqaýyl qoıa almaıdy. Saılaý barysyndaǵy saıası platformalardyń básekelestigi azamattardyń sanaly tańdaýyna alyp keledi, saılaý ádiletti ótedi dep senemin. Prezıdent saılaýynyń transparentti ótýi elimizdiń halyqaralyq qaýymdastyqtaǵy bedelin arttyryp qana qoımaı, ishki saıası turaqtylyqty nyǵaıtýǵa jáne ekonomıkamyzdyń odan ári qaryshtap damýyna jol ashpaq.
Halyqtyń basym bóligi eń aldymen áleýmettik-ekonomıkalyq máseleden ózgeris kútedi. Máselen, jaqsy ómir súrý, baqýatty turmys keshý, baǵanyń, gaz ben janar-jaǵarmaıdyń arzandaýy, ınflıasııanyń tómendeýi, jalaqynyń ósýi degen sekildi. Turmysy túzelse, soǵan yrza bolyp, tirshilik dóńgelegin súıretip júrgen qarapaıym halyq bar. Bul saılaýdyń ádiletti bolýy, erikti saılaý ınstıtýtynyń ornaýy, jańa saıası qoǵamdyq birlestikterdiń arenaǵa shyǵýy, sol arqyly Parlamenttiń jasaqtalýy, mine, shyn ózgeriske naqty jasalǵan qadamdar osylar.
Konstıtýsııalyq reformalardyń túpki maqsaty – halyqtyń ál-aýqatyn arttyrý, áleýmettik teńsizdikti joıý, eldiń turaqtylyǵyn qamtamasyz etýge baǵyttalǵanyn eskersek, bul saılaýdan keıin elimiz damýdyń dańǵyl jolyna túsip, ýáde etilgen, josparlanǵan sharýalar kezeń-kezeńimen nátıjeli júzege asady degen senim mol.
Lázzat SÚLEIMEN,
Senat depýtaty
