60 kılo salmaqtaǵy Eldos Smetov tusaýkeser kezdesýin Karamat Hýseınovke qarsy ótkizdi. 24 jastaǵy Ázerbaıjannyń balýany 2021 jylǵy álem jáne Eýropa chempıonattarynda qola medal ıelendi. Qazirgi kezde ol IJF reıtınginde 11-orynda. Salystyrmaly túrde alsaq, qandasymyz 38- satyǵa taban tirep tur. Onyń ústine dál osy jigit byltyr Býdapeshtte uıymdastyrylǵan dúnıejúzilik dodada bizdiń Maǵjan Shamshadındi qola medaldan aıyrǵan edi. Ekeýara tartys óte shıelenisti ótip, bul báseke Smetovtiń paıdasyna sheshildi. Kelesi kezeńde Eldos ızraıldik Matan Kovlaevty ıpponmen jeńdi. Shırek fınalda onyń joly álemdik reıtıngte kósh bastap turǵan taıpeılik Iаn Iýn Veımen qıysty. Tokıo Olımpıadasynyń fınalısi, Azııa oıyndary men qurlyq chempıonatynyń birneshe dúrkin júldegerine qazaq dzıýdoshysynyń áli jetpedi. Keshe keshkisin Smetov jubanysh beldesýlerinde baq synady.
Dál osy salmaqtaǵy Maǵjan Shamshadın alǵashqy aınalymda 25 jastaǵy Italııa dzıýdoshysy Andjelo Pantanomen kúsh synasty. Úzdikter tiziminde Maǵjan 9-satyǵa jaıǵassa, Apennın túbeginiń ókili qalyń toptyń ortasynda qalyp qoıdy. Soǵan qaramastan, Pantano Shamshadındi shań qaptyryp ketti.
Áıelder saıysynda asa jeńil salmaqta Ábıba Ábýjaqynova óz jankúıerlerin qýantty. Bastapqy básekesinde ol brazılııalyq Amanda Lımamen sheberlik baıqasty. IJF reıtınginde ekeýi qatar jaıǵasqan. Qazaq qyzy 22-oryndy ıelense, Panamerıka chempıony odan eki saty joǵary tur. Qosymsha ýaqytta Ábıba qarsylasyn qos jaýyrynymen jerge qadasa, kelesi kezeńde Eýropanyń eki dúrkin chempıony, álemdik reıtıngtiń kóshbasshysy, fransııalyq Shırın Býklıden basym tústi. Shırek fınalda Ábýjaqynova qurlyq birinshiliginiń qola júldegeri, serbııalyq Mılısa Nıkolıchtiń osal tusyn tapty. Osylaısha, ol jartylaı fınalǵa joldama aldy.
