Elordadaǵy erke Esildiń jaǵasynda tuńǵysh ret uıymdastyrylǵan ATR 500 sanatyndaǵy Astana Open týrnırinde álemniń eń tańdaýly degen dúldúl tennısshileri baq synap, Astana turǵyndaryna naǵyz tennıs merekesin usyndy. Bul týrnır ATR 500 sanatyna engenimen, qatysýshylardyń ataq-dańqy, Beeline Arena sport kesheniniń korttarynda ótken tartysty básekeleri, týrnırdiń joǵary deńgeıde uıymdastyrylýy Astanadaǵy jarystyń deńgeıin ATR 500-den «Úlken dýlyǵa», ATR 1000 týrnırlerine deıin kóterip tastady desek, artyq aıtqandyq emes shyǵar. Máselen, Astana Open týrnırimen qatar ótken Japonııadaǵy Rakuten Japan Open ATR 500 dodasyna álemdik reıtıngte TOP-20-da turǵan eki-aq tennısshi qatysty.
Jarystyń alǵashqy kúninen bastap sensasııaǵa toly bolǵan Astanadaǵy týrnırdiń shırek fınalyna deıin Karlos Alkaras, Felıks Oje-Alıassım, Stanıslas Vavrınka, Marın Chılıch sekildi tis qaqqan tennısshiler jetip kele almady. ¼ fınalǵa joldama alyp, baǵy janǵan segiz tennısshiniń qatarynan Andreı Rýblev, Adrıan Mannarıno, Stefanos Sısıpas, Hýbert Hýrkachpen Novak Djokovıch, Karen Hachanov, Danııl Medvedev jáne Roberto Baýtısta-Agýt tabyldy.
Alǵashqy shırek fınalda álemniń 9-raketkasy Andreı Rýblev pen fransııalyq Adrıan Mannarıno (51 ATR) sheberlik baıqasty. Qarsylastar osyǵan deıin eki ret kezdesip, ekeýi de bir márteden jeńiske jetken bolatyn. Úshinshi kezdesýde reseılik tennısshi eki sette – 6:1, 6:2 esebimen esh qınalmaı jeńiske jetip, jartylaı fınalǵa joldama aldy. Shırek fınaldyń ekinshi jubynda álemniń 6-raketkasy grekııalyq Stefanos Sısıpas polıak Hýbert Hýrkachpen oınady. О́zara segiz matchtyń altaýynda jeńiske jetken Sısıpas bul joly da Polsha ókili Hýbert Hýrkachty tize búktirdi – 7:6 (10:8), 6:3.
Úshinshi jupta álemniń 7-raketkasy serbııalyq Novak Djokovıch pen reseılik Karen Hachanov óner kórsetti. 2018 jyly Parıjde ótken «Masters» týrnıriniń fınalynda Djokovıchti jeńgen Hachanov sol jylǵy erligin qaıtalaı almady. Novak reseılik Karen Hachanovty eki sette – 6:4, 6:3 esebimen jeńip ketti. Shırek fınaldyń sońǵy juby – álemniń 4-raketkasy reseılik Danııl Medvedev pen ıspanııalyq Roberto Baýtısta-Agýt sheberlik baıqasty. Jalpy, reseılik tennısshi úshin Roberto óte qolaısyz qarsylas sanalady. Sebebi eki tennısshi arasyndaǵy bes kezdesýdiń bireýinde ǵana Danııl ıspanııalyqty súrindirgen bolatyn. Degenmen Astanada joǵary deńgeıde óner kórsetken Medvedev Baýtıstany bet qaratpaı jeńdi – 6:1, 6:1.
Osylaısha, jartylaı fınalǵa eki reseılik tennısshi – Andreı Rýblev jáne Danııl Medvedev, sondaı-aq grekııalyq Stefanos Sısıpas pen serbııalyq Novak Djokovıch shyqty.
Birinshi jartylaı fınaldyq básekede Stefanos Sısıpas pen Andreı Rýblev oınady. Eki tennısshi búginge deıin kortta 11 márte kezdesip, altaýynda grekııalyq tennısshi basym bolǵan. Bes márte jeńiske jetken Rýblev úshin bul tarazy basyn teńestiretin tamasha múmkindik edi. Alaıda Andreı ózine berilgen múmkindikti paıdalana almady. Eki saǵat on mınýtqa jalǵasqan tartysty básekeniń alǵashqy partııasy 6:4 esebimen reseılik tennısshiniń paıdasyna aıaqtaldy. Degenmen Sısıpas ekinshi sette tarazy basyn teńestirip (4:6), úshinshi, sheshýshi sette jeńisti julyp aldy – 6:3. Stefanos Sısıpas Astana Open týrnıriniń alǵashqy fınalısi atandy.
Ekinshi jartylaı fınalda Danııl Medvedev pen Novak Djokovıch sheberlik baıqasty. Eki tennısshi keıingi úsh matchta tek fınalda kezdesken. 2021 jylǵy Fransııadaǵy «Masters» pen Aýstralııa ashyq birinshiliginde Novak jeńiske jetse, sol jylǵy US Open dodasynda Danııldiń mereıi ústem boldy. Astanadaǵy jarysta eki tennısshiniń joldary jartylaı fınalda qıysty. Birinshi partııada reseılik sportshy basym bolǵanymen (6:4), ekinshi sette Djokovıch taı-breıkte sátti oınap (7:6 (8:6)), tarazy basyn teńestirip ketti. Sport keshenine jınalǵan jankúıerler sheshýshi úshinshi setti tamashalaımyz dep otyrǵanda Medvedev jaraqatyna baılanysty matchty jalǵastyra almaıtynyn aıtyp, korttan shyǵyp ketti. Danııldiń bul sheshimin jankúıerler de, Novak ta túsinbeı, biraz ańtarylyp qaldy.
Sóıtip, elordadaǵy týrnırdiń fınalynda álemniń jetinshi raketkasy Novak Djokovıch álemdik reıtıngte altynshy orynda turǵan grekııalyq Stefanos Sısıpaspen kezdesetin boldy.
Bul – grekııalyq tennısshiniń bıylǵy maýsymdaǵy jetinshi fınaly. Buǵan deıin ol Monte-Karlodaǵy Malorkodaǵy týrnırlerde dara shyqqan. Qalǵan tórt fınalda qarsylasyna jol bergen edi. Al Djokovıch qatarynan ekinshi týrnıriniń fınalyna shyǵyp otyr. Astanadaǵy týrnırge deıin Tel-Avıvtegi ATR 250 dodasynda bas júldeni oljalaǵan bolatyn.
Sısıpas pen Djokovıch keshegi matchqa deıin kortta ózara 10 match ótkizgen. Sonyń jeteýinde serbııalyq sańlaqtyń mereıi ústem bolǵan bolsa, úsheýinde Sısıpas basym bolǵan. Bir qyzyǵy, grekııalyq tennıshi Novakty 2018 jáne 2019 jylǵy týrnırlerde ǵana tize búktirgen. Odan keıingi barlyq oıynda ol Djokovıchtiń osal tusyn taba almaı keledi. Olar tórt márte túrli jarystyń fınalynda baq synaǵan jáne barlyǵy serbııalyq tennısshiniń jeńisimen aıaqtalǵan-dy. Stefanos Novakty úsh márte jabyq keshendegi korttarda jeńgenin jankúıerler jaqsy biledi.
Fınaldyq matchtyń birinshi partııasyndaǵy segizinshi geımde Novak breık jasap, keıinnen óz geıminde jeńiske jetti – 3:6. Ekinshi settiń úshinshi geıminde Djokovıch taǵy bir breık jasap, 1:2 esebimen alǵa shyǵyp aldy. Keıingi geımderde eki tennısshi de qatesiz oınady. Sońǵy, onynshy geımde serbııalyq tennısshi dopty oıynǵa ózi qosyp, karerasyndaǵy 90-shy jeńisine qol jetkizdi. Qorytyndy esep – 6:3, 6:4.
Osy jeńisiniń arqasynda Novak Djokovıch Astana Open týrnıriniń bas júldesimen qosa, 500 reıtıngtik upaıy men 355 310 myń AQSh dollaryn qanjyǵasyna baılady. Al fınalda jeńilgen Stefanos Sısıpas 300 upaı men 191 180 myń AQSh dollaryn ıelendi. Sondaı-aq jartylaı fınalda utylǵan reseılikter – Danııl Medvedev pen Andreı Rýblev 180 reıtıngtik upaı men 101 890 myń AQSh dollaryn oljalady.
