Partııa hatshysy Dáýlet Káribek halyqtyq koalısııanyń qurylýy elimizde jańa saıası mádenıettiń qalyptasqanyn bildiretinin atap ótti. «Bul – eldegi birliktiń kórinisi», dedi ol. «Qasym-Jomart Kemeluly Toqaevtyń qoǵamdyq-saıası kúshterdiń keń halyqtyq koalısııasynan prezıdenttikke kandıdat retinde usynylýy – Memleket basshysynyń jáne onyń júrgizip jatqan aýqymdy áleýmettik-saıası reformalar baǵytynyń halyq tarapynan keń qoldaýǵa ıe ekendiginiń birden-bir dáleli», dedi Dáýlet Káribek.
Jıynda sóz alǵan Májilis depýtaty Aıdos Sarym ár partııanyń óz kóshbasshylary bar ekenin, biraq bul jerde memleketshildik, ulttyq turǵydaǵy másele turǵanyn atap ótti. «Basty maqsat – elde jasalyp jatqan reformalardy sońyna deıin jetkizý, olardyń myzǵymastyǵyn qamtamasyz etý. Bul isti sońyna deıin eń úzdik, eń durys jolmen jetkizetin qazirgi Prezıdent. Ekinshiden, álemdegi geosaıası jaǵdaı ýshyǵyp bara jatyr. Osyndaı ýaqytta Qasym-Jomart Toqaevtan artyq dıplomat, qaıratker tulǵa joq. Sondyqtan osy jaǵdaıattardyń barlyǵyn eskere otyryp, úsh partııa da el múddesi jolynda úlken memleketshildik tanytyp, basqa da 20-dan astam qoǵamdyq uıymmen birigip, Toqaevtyń kandıdatýrasyn usynyp otyr. Menińshe, bul zańdy qubylys», dedi ol.
Saıasattanýshy, «Aq jol» partııasynyń múshesi Bórihan Nurmuhamedovtiń aıtýynsha, eń bastysy – saılaý ashyq bolýy kerek. Spıker kandıdattardyń aldyńǵy saılaýaldy baǵdarlamalarynyń qanshalyqty oryndalǵanyn túsiný mańyzdy ekenin atap ótti.
Májiliske «Amanat» partııasynan saılanǵan depýtat Juldyz Súleımenovanyń aıtýynsha, halyqtyń koalısııa – memlekettiń basyna kún týǵan jaǵdaıda birige alatynymyzdyń naqty kórinisi.
Qoldanbaly etnosaıası zertteýler ınstıtýtynyń dırektory Talǵat Qalıev basqosý kezinde búgingi tańda Qasym-Jomart Toqaevtyń jeke reıtıngi kez kelgen qoǵamdyq uıymnyń reıtınginen asyp túsetinin aıtty.
«Ekinshi jaǵynan, Prezıdenttiń barlyq saıası partııalardan teń araqashyqtyqty ustaný – bul saıası kúshter úshin jańa synaq. Saılaýdan keıin partııalar básekege qabiletti ortada jumys isteýge, saılaýshylarmen qarym-qatynasty retteýge májbúr bolady. Partııalar júıeli ózgeristermen aınalysyp, el bolashaǵyn qalyptastyrýǵa belsendi aralasýy kerek», dedi Talǵat Qalıev.
L.N.Gýmılev atyndaǵy EUÝ prorektory Janna Qurmanǵalıeva Qasym-Jomart Toqaevtyń saılaýǵa halyqtyń koalısııanyń atynan túsýi qısyndy ekenin atap ótti. «Kez kelgen bıliktiń mańyzdy fýnksııasy – qundylyqtardy damytý, nasıhattaý ǵana emes, eń aldymen olardy ustaný. Prezıdenttiń barlyq partııadan birdeı araqashyqtyqta bolý
týraly sheshimi bıliktiń negizgi qundylyqtardy ustanatynyn kórsetedi. Bul búkil qoǵam úshin mańyzdy. Jalpy, biz jańa saıası júıeniń paıda bolǵanyna kýá bolyp otyrmyz», dedi ol.
Dıalog alańnyń moderatory, «Amanat» partııasy Saıası keńesiniń múshesi, belgili telejúrgizýshi Maqsat Tolyqbaı boldy.
Eske sala keteıik, Astanada Qasym-Jomart Toqaevty qoldaý jónindegi halyqtyq koalısııanyń forýmy ótti. Forýmǵa «Amanat», «Aq jol», Qazaqstan Halyq partııasy sekildi saıası partııalardyń jáne 20-dan astam respýblıkalyq qoǵamdyq birlestiktiń eki myńnan astam ókili qatysty.
