«Báıterek» satyp alǵannan keıin bank ataýy Bereke Bank dep ózgerdi. «Báıterek» UBH basqarma tóraǵasynyń orynbasary Ersaıyn Hamıtov atalǵan rebrendıngtiń bank jumysyna qandaı ózgerister alyp keletinin aıtty.
«Jaqyn arada banktiń tolyq rebrendıngi jáne Visa, Master Card halyqaralyq tólem júıelerimen qyzmetti keıinnen qalpyna keltirýmen, mobıldi qosymshalardyń jumysyn qalpyna keltirýmen, SWIFT-kodty aýystyrýmen sanksııalar tiziminen shyǵarý josparlanyp otyr. Sonymen qatar klıenttik aǵyndardy, depozıttik jáne kredıttik baza kólemderin jańartý boıynsha jumys júrgizilip jatyr. Bul óz kezeginde banktiń burynǵy turaqtylyq deńgeıin qalpyna keltirýge yqpal etedi», dedi.
Onyń aıtýynsha, qazir qarjy ınstıtýtynyń SDN tiziminde bolýyna baılanysty banktiń qyzmeti shektelgen. Holdıng basshylyǵynyń aıtýynsha, bankti SDN tiziminen shyǵarý máselesi pysyqtalyp jatyr. Bul prosess shamamen 1-2 aıǵa deıin sozylýy múmkin.
«Qoldanystaǵy shekteýlerdi alyp tastaǵannan keıin holdıng bankti básekeles ortaǵa berý jónindegi is-sharalardy ótkizýdi josparlap otyr. Halyqaralyq qarjy uıymdary, sondaı-aq basqa da ınstıtýsıonaldyq ınvestorlar banktiń áleýetti satyp alýshylary bola alady», dep atap ótti E.Hamıtov.
Degenmen «Báıterek» UBH basshylyǵy bankti satyp alý úshin qansha shyǵyn jumsalǵanyn jarııa etpedi.
«Báıterek eldegi aktıvterdiń edáýir kólemin, sonyń ishinde banktik aktıvterdi tabysty basqarady, qajetti quzyretterge ıe jáne satyp alynǵan banktiń dástúrli kóshbasshylyǵyn saqtaýǵa baǵyttalǵan. Mámile ózara qolaıly qarjy sharttarynda jasaldy jáne barlyq qajetti retteýshilik maquldaýlardy aldy. Mámile sondaı-aq enshiles bankti ıelengen barlyq ýaqyt ishinde aldyńǵy aksıonerdiń jınaqtalǵan ınvestısııalarynyń tolyq qaıtarylýyn qamtamasyz etedi», degen jaýap berýmen ǵana shekteldi.
Eske salaıyq, AQSh Qarjy mınısrligi sheteldik aktıvterdi baqylaý basqarmasy (OFAC) 11 shildede arnaıy lısenzııa shyǵaryp, «Sberbank» AQ enshiles bankimen mámile jasaý boıynsha merzimdi 2022 jyldyń 12 shildesi men 2022 jyldyń 11 qazany aralyǵynda belgilegen edi.
