Tegeran qalasynda ótken kezdesý barysynda óńirler arasyndaǵy kólik-tranzıttik yntymaqtastyqty damytý máseleleri talqylandy.
Jıynǵa qatysýshy elder ınfraqurylymdaǵy «kedergilerdi», atap aıtqanda ákimshilik kedergilerdi joıý jáne tasymaldaýshylar úshin qolaıly jaǵdaılar jasaý arqyly «Soltústik – Ońtústik» dálizin damytý jónindegi bastamany qoldady.
«Biz «Soltústik – Ońtústik» halyqaralyq kólik dálizi boıynsha elder arasyndaǵy tranzıttik áleýetti arttyrýǵa múddelimiz. Búgingi tańda Aqtaý porttary jáne Irannyń soltústik porttary, sonymen birge Anzalı men Amırabadtyń arasynda turaqty kólik qatynasy ornatyldy. Konteınerlik tasymaldardy damytý úshin Aqtaý porty óz qyzmetterine jeńildikter usynyp, 40 fýttyq konteınerdi aýystyryp tıeý tarıfteri tómendetildi. Sondaı-aq Qazaqstan – Túrkimenstan – Iran qurlyqtyq temirjol baǵyty boıynsha konteınerlik qatynas ornatylyp jatyr», dep atap ótti mınıstr.
Kezdesýge qatysýshylar Ortalyq Azııa elderin Parsy shyǵanaǵy men Ońtústik Azııa óńirlerimen baılanystyratyn dálizder jáne kólik obektileriniń ınfraqurylymdyq múmkindikterine qatysty máseleni de kún tártibine sáıkes talqylady.
«Qazaqstan tranzıttik tasymaldardyń jyldamdyǵy men sapasyn arttyrýǵa múmkindik beretin barlyq qajetti jaǵdaı jasap, tıisti ınfraqurylymmen qamtyp otyr. Atalǵan alań elderimizdiń múddelerin jaqyndastyra túsetinine, sondaı-aq ózara tıimdi yntymaqtastyqty qurý úshin ońtaıly mindetterdi sheshýge yqpal etetinine senimdimin», dep túıindedi Qaıyrbek О́skenbaev.
Kezdesý qorytyndysy boıynsha kólik mınıstrleriniń yntymaqtastyqty odan ári damytý týraly birlesken málimdemesine qol qoıyldy.
