VII Astana ekonomıkalyq forýmy óz jumysyn bastady

ASTANA. 21 mamyr. Búgin Astanada  VII Astana ekonomıkalyq forým ashyldy. Bul týraly egemen.kz tilshisi habarlady. Atalǵan jıyn 2-shi Dúnıejúzilik daǵdarysqa qarsy konferensııamen bastaldy. Konferensııanyń kún tártibine «Bretton-Výds kelisimderiniń 70 jyldyǵy: jahandyq qarjylyq júıeni qalpyna keltirý, sońǵy eki on jyldaǵy qarjylyq daǵdarystardyń saldaryn joıý» taqyryby qoıyldy. 3 kúnge sozylatyn forým sheńberinde konferensııalar, sammıtter, sessııalar men dıalogtar ótedi. Bularda talqylaýǵa túsetin máseleler ózektiligimen erekshe. Dálirek aıtqanda, álemdik ekonomıkalyq ósim, básekege qabilettilikti kóterý, saýdany damytý men ekonomıkalyq-áleýmettik aspektiler syndy jaǵdaıattar áńgime arqaýyna aınalady. Esterińizge sala keteıik, dúnıejúzindegi eń iri halyqaralyq forýmdardyń sanatyna jatqyzylatyn, ózara baılanystar ornatýdyń, iskerlik kezdesýler ótkizýdiń mol múmkindigin beretin Astana ekonomıkalyq forýmy 2008 jyldan beri turaqty túrde ótkizilip keledi. Bıylǵy forýmǵa álemniń 150 elinen 10 myńnan astam adam qatysady. VII Astana ekonomıkalyq forýmy aıasynda buǵan deıin birqatar mańyzdy kezdesýler uıymdastyryldy. Bul sharalarda búgingi basty ekonomıkalyq jáne áleýmettik kedergilermen kúresý tásilderi izdestirildi. Joldybaı Bazar. Derekkóz: egemen.kz. Foto: akorda.kz.