Mobıldi qosymsha arqyly satý núktesin, kómirdiń qajetti markasyn jáne kólemin tańdaý múmkindigi bar. Sonymen birge onlaın tólem jasap, taýar aqysyn 3 aıdan 6 aıǵa deıin bólip tóleýge bolady. Atalǵan zamanaýı sheshim qatty otyndy tikeleı jáne kezeksiz satyp alýǵa, sondaı-aq halyqtyń jylytý maýsymyna daıyndyǵyn aıtarlyqtaı jeńildetýge múmkindik beredi. Tıisti jumystar basqa da óńirlerde júrgiziledi.
Indýstrııa jáne ınfraqurylymdyq damý mınıstrligi Indýstrııalyq damý komıteti tóraǵasynyń orynbasary Turar Jolmaǵambetovtiń aıtýynsha, tutynýshylardyń onlaın túrde satyp alynǵan kómirdiń sapasyna kóńili tolmasa, qaıtaryp berý múmkindigi de qarastyrylǵan. Sonymen qatar tıelip jatqan kómirdiń sapasyna ózi kóz jetkizgisi keletinderdiń de onlaın túrde kezegi men ýaqytyn anyqtap alyp, barýyna da múmkindigi jasalady.
«Eger kelgen kómir aıtarlyqtaı sapasyz bolǵan jaǵdaıda ony siz qaıtara alasyz. Bul másele óńirlik kómir operatorlary men kómir razrezderiniń jaýapkershiliginde», dedi T.Jolmaǵambetov.
Aıta keterligi, vedomstvo óńirlerdiń ákimdikterimen birlesip, kómirdi jetkizip berý men bólý máselelerin erekshe baqylaýda ustap otyr.
2022 jylǵy qańtar-tamyzda elimizde 73,7 mln tonna kómir óndirilgen, bul byltyrǵy sáıkes kezeńmen salystyrǵanda 6,2%-ǵa artyq. Kómir óndirýshi kásiporyndardyń derekteri boıynsha baǵa byltyrǵy deńgeıde saqtalǵan. Al satý oryndarynda kómir baǵasynyń ósýine jol bermeý úshin ony úzdiksiz tasymaldaýdy qamtamasyz etý jáne avtomobıl kóligimen elden tys jerlerge áketýdi 6 aıǵa shekteý jóninde sharalar qabyldandy.
