Onlaın-otyrystyń negizgi taqyryby Memleket basshysy Qasym-Jomart Toqaevtyń «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda belgilengen densaýlyq saqtaý jáne bilim berý máseleleri boldy.
Kezdesý barysynda oblystardan, respýblıkalyq mańyzy bar qalalar men Astanadan ókilderi saılanatyn Palata retinde Senattyń negizgi mindetteriniń biri – óńirlerdiń damýyna belsendi járdemdesý ekendigi atap ótildi. Osyǵan baılanysty óńirlerdegi problemalardy, onyń ishinde bilim berý jáne densaýlyq saqtaý salalaryndaǵy máselelerdi sheshý jumysyndaǵy mańyzdy quraldardyń biri – senatorlardyń máslıhat depýtattarymen ózara tyǵyz is-qımyly bolyp tabylady.
«Bul salalardaǵy keıbir ózekti máseleler óz sheshimin tappaıtyny jasyryn emes. Mysaly, elimizdiń densaýlyq saqtaý salasynda halyqty alǵashqy medısınalyq-sanıtarlyq kómekpen qamtý deńgeıiniń tómendigi, áleýmettik mártebesi belgilenbegen kontıngentti áleýmettik medısınalyq saqtandyrýmen qamtý, medısınalyq qyzmetterge tarıfterdi qalyptastyrý, jergilikti jerlerde nesıe beresheginiń bolýy, negizgi kapıtalǵa jumsalatyn shyǵyndardyń azdyǵy, júıeni sıfrlandyrýdyń tómendigi, dári-dármekpen qamtamasyz etýdegi alshaqtyq, mamandardyń jetispeýshiligi jáne olardyń biliktiliginiń tómendigi jáne t. b. Bizdiń komıtet osy máselelerdi óz baqylaýynda ustaýdy jalǵastyra beredi», dedi Narıman Tóreǵalıev.
Kezdesýge densaýlyq saqtaý, ulttyq ekonomıka, qarjy mınıstrlikteriniń, Áleýmettik medısınalyq saqtandyrý qorynyń ókilderi, «Qazaqstan máslıhattary depýtattarynyń birlestiginiń» basshylyǵy, sondaı-aq respýblıkalyq mańyzy bar qalalar men aýdandardaǵy qoǵamdyq keńesterdiń tóraǵalary qatysty.
Senatorlar «Qoljetimdi jáne tıimdi densaýlyq saqtaý júıesi» taqyryby boıynsha ótetin Úkimet saǵatyna daıyndyq aıasynda kezdesý barysynda kóterilgen barlyq máselelerdi pysyqtaıtyn boldy jáne budan bylaıǵy zań shyǵarý qyzmetinde paıdalanylady.
