Birinshi kezeńde Almaty, Astana, Aqtóbe, Qyzylorda, Jambyl, Ulytaý, Qostanaı jáne Qaraǵandy óńirlerinen 32 úmitker «Qasym Amanjolov – epık aqyn» taqyrybynda esse jazdy. Al onyń arasynan oq boıy ozyq shyqqandar aqyn poemalaryn jatqa oqyp jarysty.
Sonymen qazylardyń synynan súrinbeı ótken 10 úzdiktiń ortasynan bas júldeni Jambyl oblysynyń T.Rysqulov aýdanynan kelgen Turar Jandilda ıelendi. I oryn qaraǵandylyq Jansaıa Janatovaǵa, II oryn qyzylordalyq Arýjan Abdrahmanovaǵa, III oryn Qaraǵandy oblysy Nura aýdany Muzbel aýylynan qatysqan Janargúl Sametke buıyrdy. Sonymen qatar birqatar talantty jasqa arnaıy dıplomdar da tabys etildi.
Qasym oqýlaryna Qazaqstan Jazýshylar odaǵynyń múshesi, «Qasym» respýblıkalyq ádebı-qoǵamdyq jýrnalynyń bas redaktory, jazýshy Serik Saǵyntaı, halyqaralyq «Alash» ádebı syılyǵynyń laýreaty, aqyn, aýdarmashy Dáýren Berikqajyuly, E.Bóketov atyndaǵy Qaraǵandy ýnıversıtetiniń professory, fılologııa ǵylymdarynyń doktory Jansaıa Jarylǵapova qazylyq etti.
Dástúrli oqýdy dáriptep, uıymdastyrýǵa uıytqy bolǵan N.Gogol atyndaǵy Qaraǵandy oblystyq ámbebap ǵylymı kitaphanasy. Qaraǵandy oblysynyń mádenıet, arhıvter jáne qujattama basqarmasy qoldaý kórsetken.
– Qasymnyń rýhyn asqaqtatýdaǵy aımaqtyń eńbegin aıtpaı ketýge bolmaıdy. Bir Qasymǵa arnalǵan kóp istiń baıanyn tabýyna osyndaǵy azamattar yqpal etti. Qarap otyrsańyz, «Qasym» jýrnaly, «Qasym úıi», «Qasym» portaly bar. Bári bir kúnde paıda bolǵan joq. Barshasynda eren eńbek jatyr. Bul – dúrkin-dúrkin jazýdyń, máseleni kóterýdiń nátıjesinde qol jetken dúnıe. Munyń syrtynda «Qasym» kýbogi bar. Pandemııaǵa baılanysty toqtap qaldy sońǵy jyldary. «Jýrnalıster arasyndaǵy Berdiqulov atyndaǵy týrnır sekildi Qasym týrnıri nege joq?» degen ıdeıany men aıtqanymmen, ony iske asyrǵan da osy jaqtaǵy ádebıet janashyrlary. Dástúrge arnalǵan Qasym baıqaýy ár jylda túrli janrdy qamtıdy eken. Bir jyly Qasym ánderi nasıhattalsa, endi bir jyly Qasymǵa arnalǵan músháıra, qaısybir jyldary Qasym óleńderin jatqa oqýda baq synasypty jastar. Bıyl Qasymnyń poemasyn jatqa oqý maqsat etip alynypty. Búginde poema túgili bir shýmaq óleń jattaıtyn adam kemde-kem. Soǵan baılanysty baıqaý qıyndaý ári qatysýshysy da azdaý bolǵan sekildi. Deıturǵanmen, ynta bar. Respýblıkanyń ár aımaǵynan kelgen jastardyń yqylasyna qýandym, – dedi Dáýren Berikqajyuly.
Qaraǵandy
