Jýyrda Astana qalasynda Digital Bridge 2022 Halyqaralyq forýmy barysynda «Eńbek resýrstaryn damytý ortalyǵy» AQ prezıdenti Dáýlet Arǵyndyqov jáne Coursera Eýropa elderindegi úkimettermen ózara is-qımyl jónindegi basshysy Alına Leon-Kozenko tıisti memorandýmǵa qol qoıǵan bolatyn.
«Yntymaqtastyq týraly kelisim eńbek resýrstarynyń bilimi men daǵdylaryn arttyrý úshin múmkindikterdi keńeıtýge, onyń ishinde platformalardy ıntegrasııalaý arqyly baǵyttalady. Coursera jáne Skills Enbek alańdarynda onlaın-oqytý qazaqstandyqtarǵa óz biliktiligin arttyrýǵa, jańa daǵdylar alýǵa jáne ózderi úshin jańa salada mansapty bastaýǵa múmkindik beredi», dep habarlady Dáýlet Arǵyndyqov.
«ERDO» AQ marketpleıs qaǵıdaty boıynsha kýrstarǵa qoljetimdilik beretin halyqaralyq alańdardyń qazaqstandyq balamasy bolyp sanalatyn Skills Enbek onlaın-oqytý platformasyn tehnıkalyq jáne ádisnamalyq damytýdy júzege asyrady.
Kez kelgen adam Skills-te oqýdy bastaı alady, al platformada alynǵan sertıfıkattar men daǵdylar túıindemede Elektrondyq eńbek bırjasynda avtomatty túrde kórsetiledi. Platforma 2021 jyly iske qosyldy jáne ony damytý, kýrstardyń sany men sapasyn arttyrý turaqty negizde júrgizilýde.
Búgingi tańda Skills Enbek-te 109 kásip boıynsha 157 kýrs ornalastyrylǵan, onyń 72-si tegin. Tirkelgen paıdalanýshylar sany 155 myńnan astam adamǵa jetti, al oqýdy sátti aıaqtap, 119 myń adam sertıfıkat aldy. Oqýdy aıaqtaǵandardyń ishinen 22 myń adam jumyssyz tulǵa mártebesine ıe.
Coursera-men yntymaqtastyqty qurý qazaqstandyqtarǵa qoljetimdi kýrstar bazasyn keńeıtýge jáne oǵan qoljetimdilikti jeńildetýge múmkindik beredi.
Coursera bilim berý platformasy – adamdarǵa zamanaýı bilim men ózekti daǵdylardy berý maqsatynda álemniń 250-den astam jetekshi ýnıversıtetteri men tehnologııalyq alyptardy biriktiretin álemdegi eń iri bilim berý uıymy. Jyl saıyn Coursera-da álemniń 200 elinen 100 mln-nan astam adam oqıdy. Qazirgi ýaqytta platformada 6 myńnan astam kýrstardan, 700 mamandyqtan, sondaı-aq jobalyq oqytýdyń 3 myń ınteraktıvti resýrstarynan turatyn álemdegi eń iri bilim berý baǵdarlamalarynyń kitaphanasy usynylǵan.
