Aqqýdy ánmen qaıyrǵan...

Qashanda qalam ustap, sózdiń qudiretine jetken qalamgerlerin ardaq tutyp, alaqandaryna salyp qurmet kórsetetin batyrlar men aqyndar eli – Almaty oblysy, Jambyl aýdanynyń ortalyǵy Uzynaǵashta jyr súleıi Súıinbaı men Jambyl jákesiniń izin qýǵan aqyn, kósemsóz sheberi, qarymdy jýrnalıst Orysbaı Ábdildaulynyń shyǵarmashylyq keshi dúrkirep ótti. Kesh ıesiniń júrip ótken ómir jolynan syr aqtaryp, baıan etken Qazaqstan Jazýshylar odaǵy basqarma tóraǵasynyń keńesshisi, «An Arys» baspasynyń atqarýshy dırektory, belgili aqyn Kádirbek Qunypııauly «Uzynaǵashtan bastalǵan uzaq jolǵa» toqtalyp, qalamgerdiń bolmysyn, adamı qasıetterin, qazaq sóz óneriniń qaıtpas qara naryna, shyǵarmashylyq dep atalatyn san salaly rýhanı óristiń sharbolattaı aldaspanyna aınalǵan Orysbaı aǵasyna degen inilik lebizin bildirdi. – Ár qalamgerdiń shyǵarma­shylyq álemge kelý joldary árqıly. Bireý temirden keledi, bireý kómirden keledi, endi bi­reý jeńilden keledi degendeı. Bi­raq klassıkalyq jol bireý ǵana. Ol – shyǵarmashylyqqa tike­leı ómirden kelý! Orysbaı aǵa shyǵarmashylyqqa ómirdiń ózinen kelgen qalamger. О́zi bylaı deıdi: «Qoı da baqtym, kókpar da tarttym, shóp te shaptym, júk te tasydym, máshıne de júr­gizdim, traktor otaldyrdym, boz kilemde beldestim, týrnıkte shyr aınaldym, garmon sozyp, mandolın tarttym, dombyra sherttim, saýyq-saıran keshtim, jeti ret ólim aýzynan qaldym. Bul da bolsa úlken olja shyǵar...». Mine, osyndaı azamatty ómir kór­medi, shyǵarmashylyqqa ómirdiń ózinen kelmedi dep aıta alasyz ba?», – deı kele baıandamashy «Oı toǵys» kitabynyń baspada jatyp, mınıstrlik sheshpegen sheshýdi Jambyl aýdanynyń áki­mi Mahabbat Sádýaqasuly bas-aıaǵy eki aptada, oǵan qosa «Toı bolsyn» jınaǵyn shyǵarýǵa mu­ryndyq bolǵanyn tilge tıek etip, aqynyn qadirlegen ákimge alǵys bildirdi. Ádemi keshte jazýshynyń qa­lam qarymy, azamattyǵy jaıly birqatar ádebıet tarlandary iltıpat sózderin, júrekten shyqqan jyr joldaryn arnady. Jazýshylar odaǵynyń atynan kórnekti qalamger, «Qazaq ádebıeti» gazetiniń bas redaktory Jumabaı Shashtaıuly Orekeńniń baýyrmaldyǵy, azamattyǵy jaıly áserli áńgime shertip, ıyǵyna jazýshylardyń atynan shapan japsa, Cheshenstannyń batyry, qazaqtyń kórnekti aqyny Rafael Nııazbekov: «...Qyl qobyzyn sarnatyp qońyr keshtiń, Taýly óńirdiń oı túzep tórinde óstiń. Ury-qary kóbeıgen bul zamanda, Ala jipti attamaı ómir keshtiń...» dep, al «Egemen Qazaqstan» gazeti Almaty bólimshesiniń jetekshisi, belgili aqyn, kósemsóz sheberi, syılas inisi Qorǵanbek Amanjol: «Janyńda záháriń joq, zám-zám ǵana, Tap-taza tynystaısyń tańnan ǵana, Sendegi seri júrek aǵataı-aý, Jaralǵan appaq nurdan, ardan ǵana...» degen jyr joldaryn arnady. Alash syı­lyǵynyń laýreaty, kórnekti ja­zýshy Marhabat Baıǵut Ore­keń­niń adamdyqtyń arasynda nadandyq deıtin «mına, snarıad jaryqshaqtarynan», adaldyqtyń arasyndaǵy jamandyq degen «bombadan» tazartyp júrgen «saper» sııaqty elemeıtinin, qazir kóp jerde jazýshylar ja­syp, jasqanshaqtap qalǵan jaǵdaıda aǵalaryn jasytpaı, jal­taqtatpaı mereıin kóterip, toı jasap jatqan Orekeńniń el-jurtyna, el azamattaryna rahmet aıtty. Sondaı-aq, «Jas Alashta» birge qyzmettes bolǵan «О́ner» baspasynyń dı­rektory, jazýshy Áshirbek Kópish, Orysbaı aǵanyń zeınetke shyǵarda qyzmet atqarǵan «Jetisý» gazeti ujymynyń atynan basylymnyń bas redaktory, aqyn Núsipbaı Ábdirahym, ózi jýrnalıstik eńbek jolyn bastaǵan aýdandyq «Atameken» gazetiniń bas redaktory Rátbek Terlikbaev, belgili ǵalym, akademık Tólegen Qojamqulov, partalas dosy Nurmanbet Qızatov, Jambyl aýyldyq aqsaqaldar alqasynyń tóraǵasy Manap Turapov, t.b. ádemi estelikter aı­typ, shyǵarmashylyq tabys, myqty densaýlyq tiledi. Keshte aqynnyń jyrlary oqylyp, aýdannyń «Qulan saz» folklorlyq ansambliniń ánshileri jyrqumar qaýymǵa án men kúıden shashý shashty. Ásirese, halyqaralyq baıqaýlardyń je­ńimpazy, jas ánshi Aleksandr Nechesov aqynnyń Naýryzbaı ba­tyrdyń rýhyna arnalǵan «Ba­­tyrǵa bas ııý» áni men Qa­zaq­stan­nyń eńbek sińirgen ártisi, Je­tisýdyń jeztańdaı ártisi Uljan Aınaqulovanyń oryndaýyndaǵy qaıyrmasy «...Álemge aty ja­ı­yl­­ǵan, Aqqýdy ánmen qaıyrǵan. Jebep júrgen kıesi, Aqpa jyrdyń ıesi, Kók jaılaýdyń tóresi, Súıinbaı, Jambyl jeri osy» dep keletin «Maıtóbe» áni jınalǵan jurt­shylyqty keremet áserge bóledi. Gúlzeınep SÁDIRQYZY, «Egemen Qazaqstan». Almaty oblysy, Jambyl aýdany.