Sýretterdi túsirgen Erlan OMAR, «EQ»
Kórme aıasynda kóptegen shara josparlanǵan. Olar – aýyl sharýashylyǵyndaǵy tyń tehnologııalardy tanystyrýdan bastap, túrli taqyryptarǵa konferensııa, iskerlik kezdesý ótkizý, taýarlar men ónimder saýdasy, aýksıon, baspasóz máslıhaty men jeke kezdesýler jáne taǵy basqa is-sharalar.
Kórmeniń jalpy aýmaǵy 20 myń sharshy metrdi quraıdy. Keshe kórmeniń resmı ashylý saltanaty ótti. Kórmege qatysýshylardy elimizdiń Aýyl sharýashylyǵy mınıstri Erbol Qarashókeev quttyqtady.
«KazAgro/KazFarm – óte mańyzdy oqıǵa. Aýyl sharýashylyǵy taýar óndirýshileriniń asa kúrdeli de jaýapty jumysynyń nátıjesinde bıyl egin oraǵyn óte jaqsy nátıjelermen aıaqtaǵanymyzdy kórip otyrmyz. Bul kórme aıasynda kóptegen kelisimshartqa qol qoıylatynyna senimdimin. Bizdiń kompanııalar baılanys, tehnologııa jáne ozyq tájirıbe almasý arqyly ózderi úshin kóptegen múmkindikti ashatynyna senimdimin», dedi mınıstr.
Al Aýyl sharýashylyǵy vıse-mınıstri Tamabek Ábilqaıyr Qazaqstan – agrarly el bolǵandyqtan, agroónerkásip kesheni el ekonomıkasynda sheshýshi ról atqaratynyn jetkizdi. Bul – eldiń turaqty damýyn, qaýipsizdigin jáne eksporttyq áleýetiniń ósýin qamtamasyz etýdiń eń mańyzdy faktory. Agroónerkásiptik keshen – halyqtyń jartysyna jýyǵy úshin negizgi tabys kózi jáne aýyl sharýashylyǵy ónimderin óndirýge, ony óńdeýge jáne saqtaýǵa mamandanǵan, sondaı-aq aýyl sharýashylyǵy men qaıta óńdeý ónerkásibin qajetti ónimdermen qamtamasyz etetin tyǵyz ekonomıkalyq jáne óndiristik baılanystary bar salalardy qamtıdy. Kórmeniń maqsaty – aýyl sharýashylyǵy salasyndaǵy jetistikterdi kórsetý jáne Qazaqstannyń barlyq fermerin biregeı alańǵa biriktirý. Kórme ótkizý ıgi dástúrge aınalǵany qýantady», dedi vıse-mınıstr.
Saltanatty is-sharada dıplomatııalyq mıssııalar basshylary atynan Germanııanyń Qazaqstandaǵy Tótenshe jáne ókiletti elshisi Monıka Iversen nemis kompanııalary úlken qyzyǵýshylyq tanytatyn agroónerkásip kesheninde Qazaqstannyń áleýeti zor ekenin, búgingi tańda kórmege usynylǵan kompanııalardyń sany ótken jylmen salystyrǵanda eki esege ósip, 24-ke jetkenin atap ótti.
Qazaqstan men Germanııa arasyndaǵy ózara is-qımyldyń mańyzdylyǵyn DLG (Germanııa aýylsharýashylyq qaýymdastyǵy) basqarýshy dırektory Tobıas Eıhberg de atap ótti. Spıker «KazAgro/KazFarm» bilim almasý, ınnovasııalar men ǵylymı ázirlemelerdi kórsetý, sondaı-aq óndirýshiler, fermerler jáne tutynýshylar arasynda baılanys ornatý úshin tamasha alań ekenin atap ótti.
Al «Rostselmash» kompanııasynyń Qazaqstandaǵy satý departamentiniń dırektory Sergeı Robchenko tıimdi yntymaqtastyqqa múmkindik beretin jáne jańa nárselerdi úırenýge qolaıly jaǵdaı jasaıtyn tamasha platforma úshin uıymdastyrýshylarǵa alǵys aıtty.
Kórme tarıhynda alǵash ret Astanada asyl tuqymdy qoshqarlar men eshkilerdiń bıomaterıalynyń (uryǵynyń) aýksıony ótti. Bul aýksıonnyń ereksheligi, janýarlardy irikteýge, sol arqyly et, sút jáne júnniń eń joǵary sapasyna qol jetkizýge múmkindik bar. Mysaly, Gempshır asyl tuqymdy qoshqar bıomaterıaly 100 jylǵa deıin saqtalady. Mundaı bıomaterıaldyń baǵasy jyl saıyn ósip kele jatqanyn atap ótken jón. Kórmege osy sekildi «elıtalyq» synyptaǵy asyl tuqymdy Edilbaı, Dorper, Qarakól, Merınos, Svartbles tuqymdary, Zaanen sútti eshkileri qoıylady. Sháýetti krıokonservasııalaý zerthanada IMV tehnologııasy boıynsha (Fransııa) júrgiziledi.
Kórme barysynda usynylatyn ınnovasııalyq tehnologııalyq sheshimderdiń qatarynda sıyrlarǵa qolaıly jaǵdaı jasap, ónimdilikti arttyrýǵa arnalǵan Dairy Robot R9500 saýý robotynyń tusaýkeseri de bar.
Kórme aıasynda alǵashqy kúni «Úzdik saýynshy» baıqaýy ótti, onda árkim iri qara maldy saýý sheberligine testileýden ótti. Qaýipsizdik maqsatynda baıqaý sıyrlardyń aǵash úlgileri boıynsha ǵana ótkizildi. Saýynshylar baıqaýyna qatysý erikti túrde boldy. Qatysqandardyń birazyn er adamdar qurady.
Sondaı-aq kórme barysynda mal ósirýshiler, veterınarlar jáne Qazaqstannyń mal sharýashylyǵy salasynyń ınvestorlary úshin «Joǵary sapaly ıdentıfıkasııa quraldaryn paıdalana otyryp, janýarlardyń asyl tuqymdylyǵyn jaqsartý: Qazaqstan Respýblıkasyndaǵy aǵymdaǵy tájirıbe jáne bolashaq áleýeti» aqparattyq sharasy ótti.
Kórmege qatysý kez kelgen adam úshin paıdaly deýge bolady. Máselen, kórmeni aralaı júrip Qazaqstanda satylyp jatqan túrli aýyl sharýashylyǵy tehnıkalarynyń onlaın bazary sekildi arnaýly mobıldi qosymshany júktep alýǵa, sol arqyly qaı jerde qandaı tehnıka satylymǵa shyǵarylatynyn bilip, onyń ıesimen qolma-qol kelissóz júrgizýge bolady. Osy qosymshany ázirlegen «Traktor.app» mamandary bul servıstik qyzmettiń qarapaıym sharýalarǵa kómegi mol ekenin aıtty.
