Zaýyttyń №1 jáne №2 balqytý sehtary kásiporyn ashylǵaly beri jumys istep kele jatyr. Sehtardy jańǵyrtýdyń kompanııa úshin ǵana emes, aımaq úshin de strategııalyq mańyzy bar. «Qazhrom» transulttyq kompanııasy damý strategııasyn qaıta qarastyra kele 600-ge jýyq adam jumys isteıtin eski sehty jańǵyrtýdy uıǵarǵan. Bul rette óndiristik qýatty arttyrý ǵana emes, sonymen qatar gaz tazartý júıesin jetildirýge basymdyq beretin ekologııalyq jobalardy júzege asyrý da erekshe mańyzdy.
– Sehtardy jańǵyrtý Aqtóbe oblysynyń tabıǵat qorǵaý jobalaryn júzege asyrý boıynsha Jol kartasyna engizildi. Biz bul jumystardy der kezinde tyńǵylyqty oryndaýdyń mańyzyn túsinemiz jáne ol úshin bar kúshimizdi salyp jatyrmyz. Qazirgi kúni jobalaý tolyq aıaqtaldy, negizgi tehnologııalyq jabdyq satyp alynǵan. Geologııalyq ahýalǵa baılanysty merdiger mekeme kesh anyqtaldy. Qazir merdiger uıym jobany iske asyrýdy bastap ketti. №2 balqytý sehynyń gaztazartqyshyn jańartý jyl sońyna deıin, al №1 balqytý sehynda kelesi jyldyń birinshi jartyjyldyǵynda aıaqtalady dep josparlanyp otyr, – deıdi «Qazhrom» transulttyq kompanııasy» AQ prezıdenti Sergeı Prokopev.
Jobany iske asyrý barysynda elektrli súzgiler jeńdik súzgilerge aýystyrylady. Olar aldyńǵysyna qaraǵanda eki ese tıimdi. Sondaı-aq sehtardyń ishindegi gaz qubyrlary júıesi jańǵyrtylyp, jańa súzgilerge gazdardy buryp jiberý úshin tómengi zonttar qondyrylady. Budan ózge joǵary qýatty tútintartqylar men qosymsha qosalqy stansa turǵyzylady.
Aspırasııalyq júıeni «EnergoMashEkologııa» (Ýkraına) ınjınırıngtik kompanııasy ázirlegen. Atalǵan kompanııa ferroqorytpa óndirisindegi aspırasııalyq júıelerdi óndirý salasynda kósh bastap keledi. Al Aqtóbe metall qurastyrý zaýytyna qarasty «QazEnergoMashEkologııa» mamandary qurastyrýmen aınalysty.
– Jobany júzege asyrý nátıjesinde balqytý sehtarynyń jumys keńistiginen shańdy irikteý jaqsarady. №2 balqytý sehynyń elektr súzgilerin jańartýdan ózge, shyǵaryndy shahtalary men gaz qubyrlarynyń aspırasııa júıesin, №1 jáne №2 balqytý sehtarynyń pesh qaqpaqtaryn tyǵyzdaý jumystary qolǵa alynady. Bul jumystar gaztozańdyq shyǵaryndylardy oqshaýlaý maqsatynda júrgiziledi. Jobanyń nátıjesinde, 2024 jyly shań shyǵaryndylaryn ortasha eseppen 1 830 tonnaǵa deıin qysqartý kózdelip otyr. Bul qorshaǵan ortaǵa júktemeni kemi 30 paıyzǵa azaıtýǵa sep, – deıdi «Qazhrom» transulttyq kompanııasy» AQ bas ekologi Svetlana Mashenko.
Qazirgi kúni jeńdik súzgiler men gaz qubyrlarynyń, tútintartqynyń astyna tireýishter ornatylyp, irgetastar qalanǵan. №2 balqytý sehyndaǵy jumys keńistiginen shańdardy qarmaýǵa arnalǵan tómengi zonttar qondyrylyp jatyr.
