Amerıka úshin de úlgi bolarlyq model

Ońtústik Kalıfornııa ýnıversıteti memlekettik basqarý salasynyń qurmetti professory Chester Nıýland Qazaqstannyń memlekettik qyzmet isterindegi modeldi AQSh úshin de úlgi bolatyndaı dep baǵalaıdy. Bul pikirdi ol Qazaqstan Respýb­lıkasynyń Memlekettik qyzmet isteri agenttiginde jýrnalıstermen bolǵan suhbatynda aıtty. Professordyń paıymynsha, Qazaq­stannyń memlekettik qyzmet júıesindegi reformalaryna sáıkes, saıası memlekettik qyzmetkerler sany azaıyp, onyń ornyna 2050 jylǵa deıingi eldik damý strategııasyn júzege asyrýǵa belsene kirisetin ákimshilik qyzmetshiler sany arta túsetin bolady. «Qazirgi tańda Qazaqstannyń memlekettik qyzmet júıesi, meniń oıymsha, álemdegi eń ozyq úlgilerdiń biri, tipti, AQSh-pen salystyrsaq ta solaı. 70-shi jyldary AQSh saıası qyzmetshiler sanyn arttyrý jolyn ustanǵan bolatyn. Al bul máselede amerıkalyq úkimet belgili bir deńgeıde olqylyq jiberdi. Bizge, kerisinshe, sizderdiń memlekettik qyzmet júıesindegideı baǵytta jumys jasaý kerek edi», dedi professor Chester Nıýland jýrnalısterge bergen suhbatynda. Aıta keterligi, Chester Nıýland AQSh Mem­lekettik basqarý ulttyq aka­de­mııasynyń jáne Aýmaqtyq basqarý jónindegi halyqaralyq qaýymdastyqtyń múshesi bolyp tabylady. 1977-1978 jyl­dary ol AQSh-taǵy memlekettik qyz­met salasynyń sońǵy zańnamalyq ózgeristerine basshylyq jasaǵan. Toqtala ketetin jaıt, osydan az buryn amerıkalyq professor Qazaqstan Prezıdenti Nursultan Nazarbaevqa hat joldap, onda ol Elbasynyń táýelsizdik jyldarynyń qıyn kezeńderindegi qajyr­ly eńbegi men áreketterine tánti bolǵanyn jetkizgen edi. Ol, sondaı-aq, osyndaı batyl sheshimniń arqasynda azamattardyń ómir sapasy jaqsara túskenin, qazaqstandyqtardyń kóńilinde olardyń laıyqty ómirine degen senim men jiger uıalaǵanyn atap ótken bolatyn.