Saýda jáne ıntegrasııa mınıstrligi baspasóz qyzmetiniń habarlaýynsha, jaqynda Saýda jáne ıntegrasııa mınıstri Serik Jumanǵarın azyq-túlik qaýipsizdigin qamtamasyz etý jáne áleýmettik mańyzy bar azyq-túlik taýarlarynyń baǵasyn ustap turý aıasynda selektorlyq keńes ótkizdi, onda áleýmettik mańyzy bar ónimderge 10 paıyzdan aspaıtyn saýda ústemesin saqtaý týraly memorandýmdar jasasý qajettiligi týraly másele qaraldy.
Qazirdiń ózinde Shymkent, Almaty qalalarynda, Qostanaı, Aqtóbe, Atyraý, Shyǵys Qazaqstan, Batys Qazaqstan, Abaı oblystarynda «Magným», «Smol», «Anvar», «Astyqjan» jáne basqa da iri saýda jelilerimen 40 memorandým jasalǵan. Bul shara Qazaqstannyń iri saýda jelilerinde áleýmettik mańyzy bar azyq-túlik ónimderiniń baǵasyn tómendetýge múmkindik bermek.
«Biz saýda jelileriniń reestrin jasaǵan bolatynbyz, búgingi tańda elimizde olardyń sany 109-ǵa jetip otyr jáne 1 458 fılıaly bar. Biz árbir fılıaldy bilemiz, ákimdikter memorandýmdarǵa qol qoıý jumystaryn júrgizýde. Máselen, búginde 40 memorandýmǵa qol qoıyldy, qalǵandary kelisý satysynda», dedi Saýda komıtetiniń tóraǵasy Erjan Qazanbaev.
Sonymen qatar Saýda komıteti negizgi azyq-túlik taýarlary baǵasynyń ósý dınamıkasynyń derekterin taldaýdyń durystyǵyn arttyrý úshin qoǵamdyq baqylaýdy engizgenin atap ótken jón: turǵyndardyń áleýmettik mańyzdy azyq-túlik taýarlary tizbesine kiretin ónimderge joǵary baǵaǵa ótinishterin qabyldaý úshin call-ortalyq qurylǵan.
Shaǵymdar Facebook, Instagram áleýmettik jelilerindegi mınıstrlik akkaýnttary arqyly da qabyldanady.
