Kollajdy jasaǵan Qonysbaı ShEJIMBAI, «EQ»
Premer-Mınıstr Álıhan Smaıylovtyń tóraǵalyǵymen ótken Úkimet otyrysynda halyqty jumyspen qamtý máselesi qaralyp, eńbek naryǵyndaǵy ahýaldy baıandaǵan Eńbek jáne halyqty áleýmettik qorǵaý mınıstri Tamara Dúısenova turaqty jumys oryndaryn qurý kórsetkishi boıynsha Qyzylorda oblysy aımaqtar arasynda úzdikter qatarynda ekenin jetkizdi.
«Qyzylorda oblysynyń óte jaqsy nátıjege qol jetkizgenin atap ótken jón. Qyzylorda oblysyndaǵy eń joǵary kórsetkish – 88%, onyń ishinde 84 paıyzy zeınetaqy aýdarymymen rastalǵan», dedi mınıstr.
Oblys ákimi Nurlybek Nálibaev Úkimet basshysy Álıhan Smaıylovqa onlaın rejimde osy baǵytta atqarylǵan jumystar retin baıandap, bıyl óńirde 30 myńnan asa jańa jumys ornyn qurý josparlanǵanyn, búginde 21,8 myń jańa jumys orny ashylǵanyn málimdedi.
– Ulttyq jobalar sheńberinde 3,2 myń adam jumysqa ornalastyrylyp, olardyń zeınetaqy aýdarymdary 84 paıyzdy qurady. «Kásipkerlikti damytý ulttyq jobasyna» qatysýshylar sany – 41,2 myń adam. Onyń ishinde 9,2 myńy – bos jumys ornyna, 12,9 myńy sýbsıdııalanatyn jumys oryndaryna ornalastyryldy. 2,3 myń turǵyn qaıtarymsyz grant alyp, jeke kásibin ashty. Qalǵan 16,8 myńy onlaın kýrstar men qysqamerzimdi oqý kýrstaryna joldanǵan.
Memleket basshysynyń jyl saıyn 10 myń adamǵa shaqqanda keminde 100 jumys ornyn qurý tapsyrmasyna sáıkes bıyl oblysta 4 587 jumys ornyn qurý josparlanǵan. Toǵyz aı qorytyndysynda bul 5 691-ge jetip, kórsetkish 124,1 paıyzǵa oryndalyp otyr, – dedi N.Nálibaev.
Sondaı-aq 100 myń jasty jumyspen qamtý tapsyrmasyna sáıkes kelesi jyly aımaqta 6 myń adamdy jumysqa ornalastyrý josparlanýda. Onyń ishinde 3 myń azamat bos jumys oryndaryna barsa, 3 myń adam jumyspen qamtýdyń belsendi sharalaryna tartylady. Bul jastar arasyndaǵy jumyssyzdyq deńgeıin 3,9 paıyzǵa tómendetedi.
Aımaqta jańa jumys oryndaryn qurý, jumyspen qamtý, qysqartýdyń aldyn alý jáne jalaqy kólemin 50%-ǵa deıin arttyrý baǵytynda 52 iri jáne orta kásiporynmen memorandým jasalǵan.
Oblys ákimi halyqtyń ál-aýqatyn kóterý, turmys sapasyn jaqsartý basty mindet ekenin atap ótip, onyń oryndalýy turaqty baqylaýda bolatyndyǵyn jetkizdi. Oblystyq jumyspen qamtýdy úılestirý jáne áleýmettik baǵdarlamalar basqarmasyna, aýdandar men Qyzylorda qalasynyń ákimderine jospardy oryndaý úshin naqty tapsyrmalar berildi.
