Aımaqtar • 14 Qazan, 2022

«Kógildir otynnyń» ıgiligi

270 ret

kórsetildi

1 mın

oqý úshin

Bıyl gazben jabdyqtaý baǵytyndaǵy 14 jobany júzege asyrýǵa 5,8 mlrd teńge qaralǵan. Onyń 4,3 mlrd teńgesi respýblıkalyq, 542 mln teńge oblystyq bıýdjetten bólinipti. Oblys turǵyndaryn gazben jabdyqtaýǵa túrli baǵdarlamalardyń da kómegi kóp bolyp otyrǵandyǵy baıqalady.

Murat JETPISBAEV

Eldegi azamattardyń jaǵdaıyn birshama jeńildete túsetin bastamaǵa «Aýyl – el besigi» aıasynda 795 mln, al «Jumyspen qamtý jol kartasy» baǵdarlamasy sheńberinde 257 mln teńge qaralǵan.

Jyl basynan beri Qazaly qalasy, Shıeli aýdanynyń Alǵabas, Aqmaıa eldi mekenderin gazdandyrý men Tereńózek kentindegi keıbir kóshelerge gaz qubyryn tartý aıaqtalyp, paıdalanýǵa berildi. Jazdan beri Qarmaqshy aýdanyndaǵy Tóretam kenti men Aqaı aýylyn, Aral aýdanyndaǵy Sekseýil kentin gazdandyrý jáne Shıeli aýdanyndaǵy Tartoǵaı eldi mekeninde AGTS ornatý qolǵa alynǵan.

Qyzylorda qalasyna qarasty Naýryz jáne Mahambet eldi mekenderinde 2021 jyly bastalǵan gazdandyrý jobasy keler jyly aıaqtalady. Qazir kóshelerge qubyrlar tartylyp, aýyl halqy gaz jaǵatyn kúndi asyǵa kútip júr.

Aımaq basshysynyń tapsyrmasymen 2022-2025 jyldar aralyǵynda 42 aýyl kógildir otynǵa qosylýy kerek. Jalpy, osy jyly óńirdi gazdandyrý kórsetkishin 68%-ǵa jetkizý josparlanyp otyr.