Ádebı keshke Pavlodar oblysynyń mádenıet, tilderdi damytý jáne arhıv isi basqarmasy basshysynyń mindetin atqarýshy Medet Taýasqan, Qazaqstan Jazýshylar odaǵy basqarma tóraǵasynyń birinshi orynbasary, aqyn Aqberen Elgezek, Qazaqstan Jazýshylar odaǵynyń hatshysy, Astana qalalyq fılıalynyń dırektory, aqyn Dáýletkereı Kápuly jáne Ertis-Baıan óńiriniń qalamgerler qaýymy qatysty.
Jınalǵandar mádenı jıynnyń mańyzdylyǵy, ult keleshegi men ádebıet bolashaǵyna tıgizer áseri jaıly oı bólisti. Medet Taýasqan atalǵan kesh Ult ustazynyń mereıtoıyna arnalǵan is-sharalardyń qorytyndysy retinde uıymdastyrylǵanyn aıta kele, aqyn-jazýshylardyń qalamynan týǵan shyǵarmalar – oqyrmannyń ıgiligine aınalatyn rýhanı qazynalar ekenin atap ótti.
«Ertiske tamǵan sóz nury» ádebı keshinde Ertis-Baıan óńiriniń qalamgerleri ádebıetti damytýǵa qosqan úlesi úshin ádebı syılyqpen marapattaldy. Olardyń qatarynda aýdarmashy Serik Satybaldın, Mádenıet qaıratkeri Meıram Nuǵyman, Máshhúr Júsip óleńderin orys tiline tárjimalaýshy Qanat Qanapııanov, aqyn, satırık Alpysbaı Honj, aqyn, aýdarmashy Aıbek Oralhan jáne Altynbek Muqyshev, Almas Aqtasov, Baqbergen Darıǵauly, Nurbek Keńesbaı, Elmıra Abetjanova, aıtysker aqyn Bóken Jiger bar.
Sonymen birge oblysymyzdyń til janashyrlaryna Ǵylym jáne joǵary bilim mınıstrligi Til saıasaty komıteti tóraǵasynyń Qurmet gramotasy men Alǵyshaty tapsyryldy.
Bıyl óńirimizge belgili jeti qalamger Sholpan Baıǵaly, Ǵabıt Saparov, Asyǵat Turǵanbekov, Amantaı Toıshybaıuly, Jasserik Sadýaqasov, Erbol Qaıyrov, Raýza Musabaeva Qazaqstan Jazýshylar odaǵy músheleriniń qataryn tolyqtyrdy. Qalamgerlerge múshelik kýálikti qurmetti qonaqtar tabystady. Aqberen Elgezek sózin Ertis-Baıan óńirine kóńil aıtýdan bastady. Jaqynda ómirden ótken Alashtyń aıtýly aqyny Arman Qanı týraly tebirene sóıledi.
– Arman Qanı – azamattyq ustanymyna berik, qalamyn satpaǵan, óziniń ómirlik qaǵıdalaryna adal bolǵan qazaqtyń qaısar aqyny edi. Arman aǵa ómiriniń sońyna deıin shyǵarmashylyǵyn bir mysqal da tómendetken joq, – dedi.
Aıtyp óteıik, «Naızatas» ádebı-kórkem, qoǵamdyq-saıası jýrnaly 2012 jyldyń sáýir aıynan Pavlodar qalasynda jaryq kóre bastady. Osy ýaqytqa deıin qanatyn keńge jaıyp, respýblıka aýmaǵyna tanyldy. Jýrnaldyń ózge óńirlik ári respýblıkalyq basylymdardan ereksheligi – kóztartar erekshe bezendirilýi men basyp shyǵarylatyn qaǵazynda. Muqabadan bastap, tolyq ishki betteri sapaly qaǵazda, túrli tústi etip basylady. Jýrnalda turaqty aıdarlardan bólek, redaksııa janynan qurylǵan «Móldir mýza» jastar shyǵarmashylyǵy klýbynyń uıymdastyrýmen ótetin suhbattar, avtorlar shyǵarmalaryna taldaýlar, toptamalar turaqty jarııalanyp keledi.
Jýrnaldyń alǵashqy bas redaktory ardager jýrnalıst Ǵalymbek Jumatov. Qazirgi kúni bul abyroıly mindetti Aqparat salasynyń úzdigi Asyl Ábishev qolyna alǵan. Ádebı jýrnal «Ertis Medıa» holdınginiń quramyna kiredi.
Keshte kelýshiler nazaryna Buqar jyraý atyndaǵy ádebıet jáne óner mýzeıi men S.Toraıǵyrov atyndaǵy oblystyq kitaphana uıymdastyrǵan jerles qalamgerler men «Naızatas» jýrnalynyń 10 jyldyǵyna arnalǵan ádebı kórmeni tamashalady. Jıyn Ertis-Baıan óńiri ónerpazdarynyń án shashýymen túıindeldi.
PAVLODAR
