Kólge jiberilgen shabaqtar osy jyldyń sáýir aıynda Alakól sazandarynyń ýyldyryǵynan. Sóıtip Qapshaǵaı irgesindegi arnaıy sharýashylyqta ósirilgen. Mine, araǵa alty aı salyp Balqash kóline jiberildi.
Mamandar áýeli shabaqtar jetkizilgen kóliktegi sýdyń temperatýrasy men kól sýynyń temperatýrasyn salystyrdy. Sáıkes eken, 14-15 gradýs nólden joǵary. Sondaı-aq ondaǵan shabaqtyń salmaǵyn ólshedi. Ártúrli, biri 7 gramm bolsa, endi biri 102 gramm basty.
Osylaısha, shabaqtar qalyń qamystyń túbine, kúnniń tynyǵynda, jelsiz ýaqytta kólge jiberildi. Onysy jyrtqysh balyqtardan qorǵanýyna jáne kól sýynyń temperatýrasyna beıimdelýine sep.
– Kólge balyq jiberý jumystary Balyq sharýashylyǵy ǵylymı-zertteý ortalyǵynyń usynystary negizinde júzege asyryldy. Igi sharanyń bizdiń Kóksheteńizimiz, kóldiń tutas soltústik óńiriniń faýnasy úshin mańyzy zor. Tabıǵı resýrstarǵa qamqorlyq tanytsaq, teńdessiz baılyq sanalatyn kóldi, kóldi mekendeıtin balyqtardyń túr-túrin saqtaı otyryp, keleshekke amanattaımyz, – deıdi «Qazaqmys Smeltıng» JShS bas ekologi Aınur Tóleýova.
Balyq sharýashylyǵy ǵylymı-óndiristik ortalyǵynyń Bas dırektory, bıologııa ǵylymdarynyń doktory Qýanysh Isbekov atap ótkendeı, bul kúni memleket tarapynan balyq sharýashylyǵyn damytýǵa erekshe kóńil bólinip otyr. Osy maqsatta 2030 jylǵa deıingi arnaıy baǵdarlama qabyldanǵan. Mamandar ǵylymı-zertteý nátıjelerin basshylyqqa ala otyryp, balyqtyń sırek túrlerin qaıta kóbeıtýge múddeli.
Kólge jiberilgen balyq shabaqtarynyń ósip-jetilýi Ekologııa, geologııa jáne tabıǵı resýrstar mınıstrligi Balyq sharýashylyǵy komıtetine qarasty Balqash-Alakól oblysaralyq basseın ınspeksııasy, Balyq sharýashylyǵy ǵylymı-óndiristik ortalyǵynyń Balqash fılıaly, jergilikti ákimdik jáne «Qazaqmys Smeltıng» JShS mamandarynyń jiti qadaǵalaýyna alyndy.
Balyqtyń osynaý sazan degen túri Balqash kólin 1906 jyldan beri mekendese kerek. Tipten, bir kezderi kóldegi balyqtyń
60-70%-y sazan bolǵan eken.
Mundaı ekologııalyq aksııany ótkizýdiń mańyzy zor. Onyń ústine, búginde kópshilik Balqash kóliniń tartylyp bara jatqanyna alańdaýly. Qalaquraýshy kásiporynnyń osylaısha qorshaǵan ortany, Balqash kólin qorǵaýǵa atsalysýy rasymen kóńilge jylý uıalatady.
Qýanysh AMANQULOV
Qaraǵandy oblysy,
Balqash qalasy
