Boksshylardyń dástúrli básekesi

Búgin Astanada Qazaqstan boks federasııasynyń kýbogy-2014 jarysynyń jerebe tartý rásimi ótedi. Onda shırek fınaldyq jekpe-jekter ótetin qalalar anyqtalady. Sondaı-aq, matchtyq kezdesýdiń qorytyndysy boıynsha komandalar teń túsip jatqan jaǵdaıda ótetin aıqastyń qosymsha salmaq dárejesi belgili bolady. Jerebe tartý rásimine oblystyq jáne qalalyq boks federasııalarynyń ókilderimen qosa, BAQ ókilderi jáne tóreshiler alqasy qatysady. Kezdesýge boks federasııasy tarapynan memlekettik jattyqtyrýshy, elimizdiń bokstan ulttyq qurama komandalarynyń úılestirýshisi Bolat Abdrahmanov, bokstan áıelder quramasy men sport jarystaryn ótkizý jónindegi úılestirýshi Berik Myrjyqbaev qatyssa, jerebe tartý rásimin XXX jazǵy Olım­pııa oıyndarynyń chempıony Serik Sápıev, Olım­pıadanyń qola júldegeri Marına Volnova men «Astana» telearnasynyń sport sholýshysy Samat Qanaǵatov júrgizip otyrady. Bıyl Qazaqstan boks federasııasynyń kýbogy besinshi ret ótkiziledi. Bul týrnır federasııanyń mańyzdy jobalarynyń biri bolyp sanalady. Qazirgi kezde ol sportshylar men jankúıerler arasynda keńinen tanylyp úlgerdi. – Qazaqstan boks federasııasy kýbogy óńirlerde boksty damytý jáne jas daryndy sportshylardy anyqtaý maqsatynda federasııasy prezıdenti Tımýr Qulybaevtyń bastamasymen bekitildi. Bıyl týrnırdiń reglamenti birshama ózgertildi. Birinshiden, qatysýshy komandalar burynǵydaı aldyn ala jekpe-jekterdi tórt topta ótkizedi. Iаǵnı, A, B, C, D bolyp ár topta 4 komanda qatysady. Alaıda, 16 komandanyń bári jerebe boıynsha óz toptaryn anyqtamaıdy. Munda reıtıng boıynsha tórt myqty komanda óz toptaryn belgilep alady. Iаǵnı, osyǵan deıin ótken tórt maýsymnyń nátıjesi boıynsha tórt «sebet» quralady. Ár «sebetten» topqa tek bir ǵana komanda túsedi. Ekinshiden, 25 mıllıon teńge kóleminde syıaqy taǵaıyndaldy. Ony jeńgen komanda utyp alady. Jarystyń jartylaı fınaly jáne fınaly 14-15 jeltoqsanda Astana qalasynda ótedi, – deıdi elimizdiń bokstan ulttyq qurama komandalarynyń úılestirýshisi Bolat Abdrahmanov. Qazaqstan boks federasııasy kýbogy jarysyna oblystyq jáne qalalyq federasııalardyń negizinde quralǵan 16 komanda qatysady. Ár komandada 49, 52, 56, 60, 64, 69, 75, 81, 91 jáne 91 kılodan astam salmaq dárejesi boıynsha 20 boksshy bolady. Matchtyq kezdesýdiń jekpe-jeginde jeńiske jetken topqa 1 upaı esepteledi. Jeńilgen topqa upaı berilmeıdi. Esterińizde bolsa, buǵan deıin ótken Qazaqstan boks federasııasy kýbogy jolyndaǵy týrnırde Asta­na qalasynyń komandasy 2010 jáne 2013 jyldary jeńim­paz bolsa, Qaraǵandy oblysy 2011 jyly, Mań­ǵys­taý oblysy 2012 jyly jeńimpaz bolǵan edi. Dastan KENJALIN, «Egemen Qazaqstan».