«Qaınar» bilim berý jáne bos ýaqytty qamtý keshenine qarasty aýla klýby negizinde ómirge kelgen qosymsha mektep – Ekibastuz qalasy bilim berý bólimi jáne jergilikti tótenshe jaǵdaılar basqarmasynyń birlesken jobasy. Munda balalardy oqytý, olarǵa mektepte alǵan teorııalyq bilimderin keńeıtýge jáne naqtylaýǵa, alǵashqy kómek kórsetý daǵdylaryn qalyptastyrýǵa, tótenshe jaǵdaılarda is-áreketter týraly bilim alýǵa, izdestirý-qutqarý jumystarynyń daǵdylaryn ıgerýge, psıhologııalyq daıyndyqtan ótýge múmkindik qarastyrylǵan.
Kásiptik baǵdarlaýǵa arnalǵan uıymǵa orta mektepterdiń 7-10-synyp oqýshylary keledi. Jas qutqarýshylar tótenshe jaǵdaılar basqarmasymen ázirlengen qaýipsizdik mádenıetin qalyptastyrý baǵdarlamasy boıynsha bilim kókjıekterin keńeıtip, dáristerdi arnaıy mamandar men pedagogter júrgizedi. Oqý-jattyǵý ortalyǵy mamandandyrylǵan jabdyqtarmen, oqý ádebıetterimen jáne azamattyq qorǵaý boıynsha ádistemelik quraldarmen jabdyqtalǵan.
Ortalyqtyń ashylýynda «Angrensor» JShS «Jas qutqarýshylar» jasaǵyna forma jıyntyǵyn syıǵa tartty.
– Balalar jylynda qolǵa alynǵan jobanyń mańyzy zor. Kóptegen joǵary synyp oqýshylary belsendi ómir saltyn ustanady, sportpen shuǵyldanady. Biz jastarǵa tótenshe jaǵdaıda alǵashqy kómek kórsetý múmkindigin usyna otyryp, áleýmettik mańyzy bar salada ózderin tanytýǵa jaǵdaı týdyramyz. Patrıotızmdi, jaýapkershilikti, belsendi qoǵamdyq ustanymdy qalyptastyrýǵa yqpal etemiz, – dedi oblystyq tótenshe jaǵdaılar departamentiniń basshysy, general-maıor Jasulan Jumashev mekteptiń ashylý saltanatynda.
Aıta ketelik, búginde Ekibastuz qalasynda 8 aýla klýby bar, olar jalpy sany 2 myńnan astam balany qamtyp otyr. «Januıa» otbasylyq klýby, jas shashtarazdar mektebi, aspazdyq klýb, balalar velotýrızmi jáne «Jas qutqarýshylar» ortalyǵy jergilikti jasóspirimder úshin asa tanymal. Al jyl sońyna deıin shaharda ulttyq oıyndar mektebin ashý josparda tur.
Pavlodar oblysy,
Ekibastuz qalasy
