Aıta keteıik, Jıgýlı Daırabaevtyń kandıdatýrasyn «Aýyl» halyqtyq-demokratııalyq patrıottyq partııasy usynǵan bolatyn.
«2022 jylǵy 4 qazanda ony «Aýyl» saıası partııasynan Qazaqstan Respýblıkasy Prezıdenttigine kandıdat etip usyný týraly qujattar OSK-ǵa usynyldy. Qazaqstan Respýblıkasy Prezıdenttigine kandıdat usyný jónindegi joǵary organ otyrysynyń hattamasynan úzindi kóshirmeler Ádilet mınıstrliginde tirkelgeni týraly qujattyń kóshirmesi, Prezıdenttikke kandıdatýrany usynýǵa kelisim berý týraly ótinishi, sondaı-aq ómirbaıandyq derekteri men saılaý jarnasynyń tólengenin rastaıtyn qujattar usynyldy», dedi QR OSK múshesi Asylbek Smaǵulov.
Ortalyq saılaý komıssııasynyń qaýlysymen kandıdatýranyń zań talaptaryna sáıkestigi anyqtaldy. Sondaı-aq kandıdatqa azamattardyń daýsyn jınaý úshin qol qoıý paraqtary berildi.
«Aýmaqtyq saılaý komıssııalarynyń hattamalaryna sáıkes, QR Prezıdenttigine kandıdatty qoldaýǵa ýákiletti tulǵalar elimizdiń barlyq 20 óńirinde 125 081 azamattyń qolyn jınady. Onyń 122 246 qoly tekserilip, 119 975-i senimdi dep tanyldy», dedi Asylbek Smaǵulov.
Ortalyq saılaý komıssııasy Jıgýlı Daırabaevty Qazaqstan Respýblıkasy Prezıdenttigine kandıdat retinde tirkedi. QR OSK tóraǵasy Nurlan Ábdirov Qazaqstan Respýblıkasy Prezıdenttigine kandıdatqa tirkeý týraly kýálikti tabys etti.
Buǵan deıin Ortalyq saılaý komıssııasy Qasym-Jomart Toqaev pen Meıram Qajykendi Qazaqstan Respýblıkasy Prezıdenttigine kandıdat retinde tirkegen bolatyn.
