Forým aıasynda Qorqyt ata atyndaǵy Qyzylorda ýnıversıteti rektorynyń mindetin atqarýshy Nurlan Orazbaev pen Enactus Kazakhstan qorynyń prezıdenti Albına Erjanova yntymaqtastyq jónindegi memorandýmǵa qol qoıdy. Kelisimge sáıkes alda keıingi tolqyn ókilderiniń kásipkerlik áleýetin damytatyn jobalar júzege asady.
Respýblıkalyq forýmda Qorqyt ata atyndaǵy Qyzylorda ýnıversıtetiniń ǵylymı jumystar jáne halyqaralyq baılanystar jónindegi prorektory Maınur Bóribaeva oqý ornynda bıznes bastaǵysy keletin jastarǵa barynsha múmkindik qarastyrylǵanyn atap ótti.
– Ýnıversıtette stýdentter arasynda kásipkerlikti damytý, olardyń tyń ıdeıalaryn qoldaý maqsatynda kásipkerlik ortalyǵy jumys isteıdi. Osy kezge deıin «Startup Bolashak. Menin armanym» jobasy, «Zhas project» baǵdarlamasy, «HackDay» jáne «Smart city Kyzylorda» hakatondary jáne bızneste jastarǵa baǵdar beretin basqa da is-sharalar uıymdastyryldy. Ortalyq bes jyl ishinde 7 myńnan asa jasqa baǵyt berdi, – dedi Maınur Ábiltaıqyzy.
Forýmda Enactus Kazakhstan qorynyń prezıdenti Albına Erjanova, joba dırektory Marjan Janǵalı prezentasııamen tanystyryp, aldaǵy josparlar, oqýshylar men stýdentterge arnalǵan múmkindikter jaıly tarata aıtty.
Qorqyt ata atyndaǵy Qyzylorda ýnıversıtetindegi kásipkerlik ortalyǵynyń jetekshisi Janarys Túbekbaev bıznes ıdeıany júzege asyrý, ınvestor tartý joldaryn túsindirdi.
QYZYLORDA
