Is-sharaǵa mektep oqýshylary, tarıh pániniń muǵalimderi, mekteptiń kitaphana meńgerýshisi qatysty. Is-sharanyń maqsaty qazaq batyry Qarakereı Qabanbaıdyń ómiri, saıası qyzmeti, erlik isteri týraly keńinen málimet berý, batyrdyń qazaq tarıhyndaǵy alatyn ornyn ulyqtaý, tulǵanyń ómirin oqytý arqyly logıkalyq, analıtıkalyq oılaýdy damytý jáne oqýshylardy babamyzdyń erligine tarıhı turǵydan baǵa bere bilýge daǵdylandyrý, tanymdyq qabiletterin arttyrý boldy.
Uly qolbasshy Qabanbaı 1692 jyly týyp, 1770 jyly dúnıe salǵan. Jeti jasynda ákesi Qojaǵul, on alty jasynda aǵasy Esenbaı jońǵarlar qolynan qaza tabady. On alty jastaǵy bala 1708 jyly jaý arasyna jasyryn baryp, aǵasyn óltirgen jońǵar batyrynan kegin qaıtarǵan. Osydan keıin Zaısandaǵy Kereı ishine baryp, apaıy men jezdesi Berdáýlettiń qolynda erjetedi. О́zine shapqan qabandardy jaıratyp, «Qaban batyr» atanatyny osy kez. Sodan bastap qashan kózi jumylǵansha qylyshyn qynabyna salmaǵan.
Dóńgelek ústel barysynda oqýshylar qazaq aqyndarynyń batyrǵa arnaǵan óleńderin oqyp, «Bilim sandyǵyna» jasyrylǵan suraqtarǵa jaýap berdi. «Erler esimi – el tarıhy» atty kitap kórmesi uıymdastyryldy. Kórmege Qabdesh Jumadilovtiń «Daraboz» shyǵarmasy, «Qazaqtyń alpys batyry», «Qazaqstan tarıhy» taǵy basqa da kitaptar qoıyldy. Mektep dırektorynyń tárbıe isi jónindegi orynbasary Mıragúl Mırǵalıqyzy kitaphana ujymyna osyndaı taǵylymdy is-shara uıymdastyrǵany úshin alǵys aıtyp, aldaǵy ýaqytta da birlesken jumystar jalǵasatynyna senim bildirdi.
Laýra ERIKQYZY,
Saǵı Jıenbaev atyndaǵy oblystyq jasóspirimder
kitaphanasynyń kitaphanashysy
AQTО́BE
