Odan óndiriletin hrom keniniń jalpy josparlanǵan kólemi shamamen – 600 myń tonna. Joba kompanııanyń shaǵyn ken oryndaryn damytý baǵdarlamasyna kiredi. Baǵdarlama ferroqorytpa zaýyttaryna shıkizatty turaqty jetkizýdi qamtamasyz etip, negizgi óndiristik qýatty ustap turýǵa múmkindik beredi.
«Geofızıkalyq-9» – sońǵy eki jylda ashylǵan úshinshi kenish. Ken ıgerýge kirispes buryn kenshiler 4,8 mln tekshe arshylym jumystaryn oryndaıdy.
– Geologııalyq qyzmet buryn anyqtalǵan ken oshaqtaryna tyńǵylyqty barlaý júrgizip jatyr. Bul – bolashaqtaǵy jumys. Kompanııanyń shaǵyn ken oryndaryn damytý baǵdarlamasy óndiristik qýatty saqtaýǵa, tutastaı alǵanda 2022 jyldan 2026 jylǵa deıingi aralyqta óndiristik kórsetkishterdi arttyrýǵa múmkindik beredi, – deıdi Dóń taý-ken baıytý kombınatynyń dırektory Azamat Bektibaev.
Jańa ken orny ashyq ádispen ıgeriledi. Arshylym jáne ıgerý jumystaryn Dóń taý-ken baıytý kombınaty – «Dóń» kenishiniń qyzmetkerleri óz kúshimen atqarady.
Taǵy eki ken orny – «Geofızıkalyq-11» jáne «Iıýnskoe» daıyndyq ústinde. Mıllıon tonnadan astam ken qory bar «Geologııalyq-1» ıgerilip jatyr. Birinshi kezeńde, osy jyldyń jazynda munda 617 myń tonna ken óndirildi. Ekinshi kezeńinde jerasty qorlary ıgeriledi. Bul jerden taǵy 413 myń tonna shıkizat alý josparlanyp otyr.
Dóń taý-ken baıytý kombınaty «Ońtústik» kenishiniń jerasty qorlary da ıgerilip jatyr. Sonymen qatar taǵy eki shaǵyn ken orny №39 jáne «Geofızıkalyq-7»-ge qujattar daıyndalý ústinde.
– Olar jerasty ádisimen ıgeriletin bolady. Aıta ketý kerek, Hromtaý aýdanyndaǵy aýqymdy geologııalyq barlaý jumystary 2016 jyldan bastap júrgizilip keledi. 2025 jylǵa deıin kezeń-kezeńimen júzege asyrý josparlanyp otyr. Geologııalyq barlaýdyń negizgi mindeti – Kempirsaı silemin zertteý kezinde hrom kenderiniń shala zerttelgen oryndaryn qaıta baǵalaý jáne jańalaryn izdeý. Bul rette geologııalyq derekterdi óńdeýdiń zamanaýı tehnologııalary jáne obektilerdi modeldeý quraldary qoldanylady, – deıdi shaǵyn ken oryndary boıynsha joba jetekshisi Vıtalıı Gýsarov.
