Kollajdy jasaǵan Amangeldi Qııas, «EQ»
FinReview.info analıtıkalyq resýrsynyń habarlaýynsha, qyrkúıek aıynda AIH óz qyzmetiniń ISO 27001 jáne ISO 27032 jahandyq standarttaryna sáıkestigin rastady. Sonymen qatar jańa eki standart – ISO 27018 ben ISO 27017 boıynsha sertıfıkattaýdan ótti. Bul standarttar tolyq bıznes sıkldiń: saýda, klırıng, esep aıyrysý, tirkeý qyzmetteriniń jáne depozıtarlyq qyzmettiń qamtamasyz etilýin qamtıdy.
Jalpy alǵanda, úshinshi toqsan ishinde AIXQI 11,67 paıyzǵa ósti. Indekstiń úsh kompanııasy toqsandyq ósim kórsetti – Kcell (+40,6 paıyz), «Bank SentrKredıt» (+37,9 paıyz) jáne Kaspi.kz (+33,7 paıyz).
«Kcell aksııalary úshin osy jyldyń úshinshi toqsany dıvıdendter tóleý merzimin shegerý týraly sheshim qabyldanǵandyqtan, osyǵan deıin qatty tómendegen qundy qalpyna keltirý toqsany boldy. Telekom-operator qyzmetiniń nátıjeleri búkil toqsan boıy ósýge negiz qalady. Kompanııanyń jarııalanǵan qarjylyq eseptiligine sáıkes 2021 jyly Kcell-diń bir aksııaǵa shaqqandaǵy taza paıdasy eki ese ósti. Bul tendensııa 2022 jyly da jalǵasyp keledi. Qyrkúıek aıynda Kcell aksııalary 5,82 paıyzǵa túzeldi. Kcell-diń negizgi aksıonerleriniń biri sanalatyn «Qazaqtelekom» kompanııasynda ádettegideı baǵa belgilenýiniń eleýsiz naryqtyq aýytqýlary bar. Qyrkúıek aıynyń qorytyndysy boıynsha kompanııanyń aksııalary 3,76 paıyzǵa ósti, al toqsandyq ósimi 7,19 paıyzdy qurady», dep jazdy FinReview.info.
2022 jyly «Bank SentrKredıt» jarııalaǵan oń qarjylyq esepter men «Alfa-Banktiń» enshiles uıymymen sátti qosylýy banktiń baǵa belgileýleriniń senimdi ósýin qamtamasyz etýde. «Bank SentrKredıt» baǵa belgileýleriniń ósýi qyrkúıekte 11,76 paıyzdy qurady. Banktiń bıznes-pozısııalarynyń jaqsarýyn S&P reıtıng agenttigi de rastady. Agenttik «Bank SentrKredıt»-tiń uzaqmerzimdi kredıttik reıtıngin «V»-dan «V+»-ke «Turaqty» boljamymen joǵarylatty.
FinReview.info-nyń habarlaýynsha, bank sektorynyń taǵy bir ókili Kaspi.kz te oń qarjylyq nátıjelerdi jarııalaýda. Budan basqa, Kaspi.kz baǵa belgileýleri jahandyq depozıtarlyq aksııalardy keri satyp alýmen jáne dıvıdendter tólenýimen (1 jaı aksııaǵa 500 teńge) qýattalyp otyr. S&P reıtıng agenttigi Kaspi Bank reıtıngin «VV-»-dan «VV»-ǵa deıin «Turaqty» boljamymen joǵarylatty. Úshinshi toqsannyń kóp bóligindegi ósýden keıin Kaspi.kz baǵa belgileýleri qyrkúıek aıynda 3,14 paıyzǵa túzeldi.
19 qyrkúıekte ótken aksıonerlerdiń jalpy jınalysynda «Halyq Bank» jaı aksııalar boıynsha dıvıdendter tóleý men onyń yqtımaldy somasy jóninde qazan aıynda sheshim qabyldaý josparlanyp otyrǵanyn habarlady. Soǵan qaramastan, Qazaqstannyń bank sektoryndaǵy kóshbasshynyń aksııalary aıdyń qorytyndysy boıynsha 7,95 paıyzǵa tómendedi. Alaıda úshinshi toqsan «Halyq Bank» úshin +3,63 paıyzben jabyldy.
«Qazatomónerkásiptiń» dırektorlar keńesi kompanııanyń 2024 jyly óndiris kólemderin jalpy josparlanǵan deńgeımen salystyrǵanda shamamen 10 paıyzǵa qysqartý jónindegi strategııasyn maquldady. Sonymen qatar qyrkúıekte ýran kompanııasynyń top-menedjmentinde kadrlyq ózgerister oryn aldy – basqarma tóraǵasy qyzmetine E.Muqanov taǵaıyndaldy, strategııa jáne damý jónindegi bas dırektor laýazymy qysqartyldy. Nátıjesinde, basqarmanyń sandyq quramy qysqaryp, 8 adamnyń ornyna 7 adam boldy. Qyrkúıek aıynyń qorytyndylary boıynsha «Qazatomónerkásip» aksııalarynyń quny azaıdy (-19,56 paıyz), nátıjesinde bul 1,32 paıyzdyq toqsandyq tómendeýge ákeldi.
«KazTransOil aksııalary munaı baǵasynyń qyrkúıekte tómendeýine baılanysty qysymǵa tústi. Aıdyń qorytyndylary boıynsha kompanııanyń baǵa belgileýleri 8,46 paıyzǵa tómendedi, al toqsan qorytyndylary boıynsha 0,58 paıyzǵa ósken», delingen FinReview.info habarlamasynda.
AIXQI ındeksiniń kompanııalary arasynda toqsan qorytyndysy boıynsha eń nashar nátıjeni Central Asia Metals kompanııasy kórsetti (-4,77 paıyz). Oǵan damýshy elderdegi ken naryǵynyń quldyraýy, resesııalyq kútýler men Anglııa banki tarapynan aqsha-kredıt saıasatynyń qataıtylýy áser etken. Qyrkúıek aıynyń qorytyndylary boıynsha kompanııa aksııalary 9,04 paıyzǵa tómendedi.
