Qut qonǵan áýlet

Olardyń arasynan konkýrs­tyń oblystyq irikteý kezeńine qala men aýdandardan 17 otbasynyń qujaty tapsyryldy. Osy jylǵy 15 shilde kúni ótken oblystyq irikteý komıssııasynyń qorytyndysy boıynsha konkýrstyń bas júldesi men úsh oryn, jeti nomınasııa belgilendi. Oblystyq jarystyń bas júldesin Nartaı aýylynda turatyn Baıjanovtar áýleti jeńip aldy.

Jaz aıynda oblystyq irikteý qorytyndysy boıynsha Dostyq úıinde marapattaý rásimi ótip, oblys ákimi Nurlybek Nálibaev jeńimpaz jáne júldeger otbasylardy quttyqtaǵan edi.

− Qazaq halqy úshin otbasy – qasıetti uǵym, qasterli qun­dy­lyq. Otbasynyń birligi – Otannyń beriktigi, aǵaıyn­nyń tatýlyǵy – atameken­niń tutastyǵy, ulttyq tárbıe­niń, adamgershilik pen ımandy­lyqtyń bastaý bulaǵy. Mem­leket basshysy Qasym-Jomart Kemeluly Toqaev «Árbir otbasyn saqtaý – Otanymyzdyń berik bolýynyń kepili. Olar­dyń árqaısysyna tutastyq pen tatýlyqtyń dástúrin ornyqtyrýymyz kerek», degen bolatyn. Búginde elimizde otbasy ınstıtýtyna qamqorlyq pen kómek úzdiksiz kórsetilip keledi. Ana men balany qorǵaýǵa arnalǵan memlekettik qoldaýlar jyl saıyn jetildirilýde. 2014 jyldan bastaý alǵan «Mereıli otbasy» ulttyq konkýrsy otba­sy qundylyqtary men qazaq úshin qashanda kıeli sanala­tyn bir shańyraq astynda bere­keli ómir súrýdiń mańyz­dy­lyǵyn nasıhattaýda orny erek­she, taǵylymdy is-shara. Bul baıqaýǵa qatysqan otbasy­lardyń barlyǵy da – naǵyz mereıli jeńimpazdar, − deıdi óńir basshysy.

Bas júlde alǵan Baıjanov­tar áýletiniń úlkeni – 99 jas­taǵy Sársenbek Baıjanov aqsa­qal. Ǵumyrynyń tabandaı qyryq jylyn ustazdyqqa arna­ǵan soǵys ardageri marapat­tary­nyń qatarynda «II dáre­jeli Uly Otan soǵysy»,  «Qyzyl Juldyz» ordenderi, «Germa­nııany jeńgeni úshin», «Eńbek ardageri» medaldary bar. Maıdanger ustaz «Shıeli aýdanynyń qurmetti azamaty» ataǵyn da alǵan.

Búginde ómirden ótip ketken qosaǵy, «Batyr ana» Jámıla apa ekeýi 11 ul-qyz ósirip, olardan 41 nemere, 50 shóbere súıdi. Sársenbek aqsaqaldyń áýleti endi respýblıkalyq dodada baq synaıdy.   

Oblystyq irikteý kezeńiniń qorytyndysynda jalaǵashtyq Mashtaevtar otbasy júldeli III oryndy, Shıeli aýdanynan qatysqan Ryspembetovter áýleti II oryndy ıelendi. Al I oryn júldesi Qyzylorda qalasynyń Ermanovtar áýletine tabystaldy. Sondaı-aq baıqaý­ǵa belsendi qatysqan otbasy­lar arnaıy atalymdarmen marapattaldy. Solardyń qataryn­da qazalylyq Súleımenov­ter áýleti – «О́nerli otbasy», qar­maqshylyq Berdibaevtar shańy­raǵy – «О́negeli otbasy», qarmaq­shylyq Shamshatovtar – «Úlgili otbasy», jalaǵashtyq Bek­nııazovtar – «Berekeli otbasy», araldyq Sydyqovtar áýleti – «Talant tuǵyry», syr­da­rııalyq Esenhojaevtar – «Ozat otbasy», jańaqorǵandyq Tóle­genovter «Tolaǵaılar otbasy» atalymdaryn ıelenip, olarǵa arnaıy júlde tapsyryldy.

Ultymyzda otbasy uǵymy­nyń orny bólek. Týǵan jerine tamyr jaıyp, saıaly báıterekke aınalǵan jandar qashanda qurmetke ıe. Olardyń ómiri jarasym, súıispenshilik, meıirim sekildi izgi qasıetter arqyly ǵana shańyraq bıik qurylyp, keregesi keńeıip, tútini túzý ushatynynyń dáleli.

Sońǵy úsh jylda Syr bo­ıynda bala týý kórsetkishi 16 paıyzǵa artyp, shańyraqtarda ińgálaǵan sábıler úni kóbeıip keledi. Oblystaǵy 141 myń otbasynyń 48 myńnan astamy – kópbalaly shańyraqtar. Altyn qursaqty analarymyzdyń 17 myńǵa jýyǵy – «Altyn alqa» jáne «Kúmis alqa» ıegeri.

Qyzylorda oblysy