Sýretti túsirgen Erlan OMAR, «EQ»
Sút bezi qaterli isiginiń erte satysynda ýaqtyly dıagnoz qoıylǵan kezde pasıentterdiń tolyq emdelýi 95 paıyzǵa deıin jetedi. Qazaqstanda 10 jyldan astam ýaqyt boıy sút bezi qaterli isigin erte anyqtaý boıynsha áıelderge arnalǵan Ulttyq skrınıng júrgizilip keledi. Tegin skrınıngti turǵylyqty jeri (tirkelgen jeri) boıynsha emhanalarda 40-70 jas aralyǵyndaǵy áıelderge ótýge bolady. 2021 jyly sút bezi qaterli isiginiń skrınıngi boıynsha 787 619 áıel tekserildi (bul jospardyń 85,5%-yn qurady). Tekserý qorytyndysy boıynsha sút bezi qaterli isigi 1 403 áıelde anyqtaldy.
Onkologter áıelderge gınekolog pen mammologten keminde jylyna bir ret tekserilý kerektigin eskertedi.
«Sút bezderiniń qandaı ózgeristerine nazar aýdarý kerek? Sút beziniń mólsheri men pishininiń ózgerýine, emiziktiń tartylýyna jáne onyń basqa jaqqa ózgerýine, erozııa, qaqyryq nemese emizik qyrtysy, emizikten suıyq aǵýy, emiziktiń syrtqy túriniń ózgerýi, keýdede, qorshaǵan tinderde nemese qoltyq asty aımaǵynda isiný, qalyńdaý nemese isiktiń paıda bolýyna, keýdeniń bir bóliginde, sút beziniń aınalasynda nemese qoltyq asty aımaqta turaqty aýyrsynýdyń paıda bolýyna nazar aýdarý kerek», deıdi sala mamandary.
Sút bezi qaterli isigimen aýyratyn naýqastardy hımıoterapııa, sáýlelik terapııa, radıkaldy hırýrgııalyq aralasý sııaqty mamandandyrylǵan emdeýmen qatar Qazaqstanda áıelderge rekonstrýktıvti qalpyna keltirý (plastıkalyq) operasııalary qoldanylady. Bul emdeý ádisi kosmetıkalyq aqaýdy joıa otyryp, radıkaldy emdeýden keıin birden jetispeıtin sút bezin hırýrgııalyq modeldeýden turady. Sút bezi qaterli isiginiń rekonstrýktıvti operasııalary áıelge sút beziniń pishinin qalpyna keltirýge jáne aıtarlyqtaı psıhologııalyq dıskomforttan arylýǵa múmkindik beredi. Qazaqstandaǵy barlyq onkologııalyq aýrýdy emdeýdi TMKKK sheńberinde memleket tolyǵymen qarjylandyrady.
