Memleket basshysy Qasym-Jomart Toqaevtyń tapsyrmasyna oraı halyqtyń tabysyn arttyrý baǵytynda qyrýar is atqarylǵanyn aıtsaq, artyǵy bolmas. Qazir eki qolǵa bir kúrek taýyp, otbasyn qamtamasyz etýge múmkindigi týǵandar aq-adal eńbegimen jumys isteýde.
Jyl basynan beri 16 myń adam jumyspen qamtamasyz etilse, sonyń ishinde 10 myńǵa jýyq jerlesimiz turaqty jumysqa turǵan. Baıyptap qarasańyz, az emes. Taǵy bir ereksheligi, halyqtyń tabysyn arttyrýǵa jáne jappaı kásipkerlikti damytýǵa erekshe kóńil bólinip otyr. Ásirese, kásipkerlikti damytýdyń mańyzy zor. Qolynan is keletinder óz kásibin dóńgeletse, nátıje bolyp, ádil básekelestik týyndaıtyny anyq. Jergilikti ónim mol bolǵan kezde baǵa da turaqtanýy yqtımal.
– Búginde halyqty jumyspen qamtý, jumyssyzdyq deńgeıin tómendetý maqsatynda jumys júrgizilip jatyr. Jyl sońyna deıin qolǵa alynǵan on jobanyń aıasynda barlyǵy 17 myń jumys ornyn ashý josparlanǵan, – deıdi oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Dına Ahmetjanova, – 4 myń jumys orny ulttyq jobalar aıasynda ashyldy. Oblystyń 3,5 myńnan astam turǵynyn belsendi jumyspen qamtý sharalarynyń nátıjesinde jumysqa ornalastyrdyq. Taǵy bir aıta keterligi, 8 378 adam bos jumys oryndaryna jiberildi.
Shyn máninde, ulttyq jobalar aıasynda jańa jumys oryndarynyń ashylýy óńirdegi jumyssyzdyq máselesin sheshýge birshama oń yqpalyn tıgizip otyr. Aıtalyq, «Eńbek» baǵdarlamasy boıynsha 33 aqmolalyq azamat jeke kásibin ashqan. Bul – quptarlyq qadam. Kásip ıeleri jumys aýqymyna oraı ózge adamdarǵa da sharapatyn tıgizedi. Bul tarapta tabysqa qoly jetkenderdi úlgi-ónege etip, el ishindegi jastardy jaqsy iske baýlyp, jumyldyrýǵa da bolady. Alǵa umtylǵan Aqmoladaǵy ózge de jobalar myńdaǵan turǵyndy jumyspen qamtamasyz etip, áleýmettik-turmystyq jaǵdaıyn jaqsartýǵa sep bolyp otyr.
– «Sapaly bilim» jáne «Bilimdi ult» jobalary boıynsha 170 jańa jumys orny ashyldy. «Myqty óńirler – el damýynyń draıveri» ulttyq jobasy aıasynda 358 adam jumyspen qamtamasyz etildi. Dál osyndaı ıgilik «Jasyl Qazaqstan», «Agroónerkásiptik keshen» jobalary arqyly úılestirilip otyr, – deıdi basqarma basshysy, – aıtalyq, «Indýstrııalyq-ınnovasııalyq damý» baǵyty boıynsha oblystyń 256 turǵyny jumysqa ornalasty.
Bul arada jastarǵa qulaqqaǵys retinde aıta ketetin bir másele bar. Neǵurlym suranysqa ıe, bolashaǵy bar mamandyqtardy ıgergen jón. Ár jyl saıyn ata-analar baýyr eti balalaryn áıteýir tegin oqytamyz dep júrekteri qalamaǵan mamandyqtarǵa beretinin kóz kórip júr. Tegin oqý. Kúni erteń sol jastar álgi mamandyq boıynsha jumys isteı me, joq pa, ol dál sol sátte eshkimdi qyzyqtyrmaıdy. Nátıjesinde, jastyq shaǵynyń qanshama jyly bosqa ótedi. Máselen, pedagogıkalyq oqý ornyn bitirgen keıbir jastar mektepke barǵysy kelmeıdi. Biraq osy mamandyq boıynsha oqyp, bilim alǵan. Amal joq, jumyssyzdardyń sanyn kóbeıtedi. Mine, osyndaı qatelikterge jol berilmese eken deımiz. Qazir eńbek naryǵynda suranysqa ıe mamandyqtardy oqytý qolǵa alynǵan. Jemisi de joq emes. Jyl basynan beri 500-den astam jas qysqa merzimdi kýrstarda oqyp shyǵyp, jumysqa ornalasty.
О́ńirdiń 3 275 turǵyny sýbsıdııalanatyn jumys oryndarymen qamtamasyz etilgen. Jastardyń máselesi de nazarda. Bıyl joǵary oqý oryndary men kolledjderdiń 537 túlegi eńbek jolyn bastaǵan. Osylaısha, adamdardyń turmys deńgeıin jaqsartý baǵytynda aýqymdy is atqarylyp jatyr.
Aqmola oblysy
