Jyl saıynǵy aksııa 23 qazanda dúnıejúzinde atap ótiletin Halyqaralyq qar barysy kúnine oraılastyrylǵan. Dástúrli is-shara álemde óte sırek kezdesetin jáne joıylyp bara jatqan qar barysyn saqtap qalý, jurtshylyqtyń nazaryn aýdarý maqsatynda ótkiziledi.
«Barys Arena» muz saraıynyń aýmaǵynda uıymdastyrylatyn «Qar barysyn saqtaıyq!» ekologııalyq aksııasy aıasynda jankúıerler úshin taqyryptyq fotoaımaq, elimizdiń tabıǵatynda túsirilgen ilbistiń biregeı kadrlarynyń fotokórmesi, arnaıy syılyqtar oınatylatyn vıktorına, balalarǵa arnalǵan akvagrım jáne basqa da is-sharalar uıymdastyrylady. Sondaı-aq matchty tamashalaýǵa kelgen árbir jankúıer kásibı sýretshilermen birlesip qar barysy taqyrybynda sýret salýǵa qatysa alady.
Qazaqstan halqynyń basym bóligi, ókinishke qaraı, qar barysynyń popýlıasııasyn saqtaýdyń mańyzdylyǵy men onyń joıylý sebepteri týraly bile bermeıdi. Adamdardyń tabıǵatqa beıjaı qaraýy, ekojúıelerdiń buzylýy, brakonerlik jáne klımattyń ózgerýi qar barysy sanynyń qysqarýynyń negizgi sebepteri ekeni belgili.
Qar barysy joıylyp ketý qaýpine baılanysty Halyqaralyq tabıǵatty qorǵaý odaǵynyń «Qyzyl kitap» tizimine jáne janýar meken etetin barlyq 12 eldiń, sonyń ishinde Qazaqstannyń da «Qyzyl kitabyna» engen. Bir aıta keterligi, keıingi 40 jylda Qazaqstandaǵy ilbistiń popýlıasııasy shamamen 180-200-den 135-170 basqa deıin qysqarǵan.
BUU DB birneshe jyldan beri Qazaqstan Úkimetimen birlesip Ǵalamdyq ekologııalyq qordyń (ǴEQ) qoldaýymen qar barysynyń popýlıasııasyn qorǵaý jáne saqtaý bastamasyn iske asyryp keledi. Atap aıtqanda, ǵylymı zertteýler, brakonerlikke qarsy is-qımyl, qar barysy mekendeıtin oryndardyń qorǵalýyn kúsheıtý, ekologııalyq aǵartý, ulttyq zańnamany jetildirý boıynsha is-sharalar júrgizilýde.
