Shevchenko «qazaq» bolǵysy kele me?

Tennısshilerdiń statıstıkasyn júrgizetin qosymshalardyń birinde Aleksandr Shevchenko rasymen Qazaqstannyń atynan óner kórsetip jatqany kórsetilgen. Biraq keıinnen tennısshi reseılik «Chempıonat» ınternet-basylymyna suhbat berip, Qazaqstannyń azamattyǵyn almaǵanyn aıtqan. «Buqaralyq aqparat quraldary durys túsinbegen bolýy kerek. Men Qazaqstannyń azamattyǵyn alǵan joqpyn. Ázirge barlyǵy túsiniksiz bolyp tur. Ári qaraı ne bolatyny da belgisiz», dep máseleni ekiushty etip qoıdy.

Reseılik sportshynyń bul málimdemesinen keıin Qazaqstan federasııasynyń baspasóz qyz­meti de atalǵan jaıt týraly res­mı túsinikteme berdi. Onda Aleksandr Shevchenkonyń atynan federasııaǵa Qazaqstannyń azamat­tyǵyn alý týraly óti­nish kelip túskeni aıtylady. «Bu­qaralyq aqparat quralda­rynda Reseı tennısshisi Aleksandr Shev­chenko sporttyq azamattyǵyn ózgertti jáne ol budan bylaı Qazaqstan azamattyǵyn alyp, ult­tyq qurama sapynda óner kór­setedi degen aqparat tarady. Qazaqstan tennıs federasııa­sy Aleksandr Shevchenkonyń aza­mattyq alý máselesi boıynsha ha­barlasqanyn rastaıdy. Qazirgi tańda onyń usynysy qaras­tyrylyp jatyr. Sońǵy kez­deri shetel tennısshilerinen Qazaq­stan atynan oınaýǵa usynys kóp túsip jatqanyn da málim­deımiz. Ár sport­shynyń ótinishin jeke-jeke qarastyryp, muqııat tekseristen ótkizemiz. Shetel ten­nıs­shileriniń Qazaqstan aza­mat­tyǵyn alǵany týraly naq­ty aqparat shyqqan jaǵ­daıda Qazaqstan tennıs federa­sııa­sy muny jedel túrde óz jan­kúıerlerine habarlaıdy», de­lingen habarlamada.

Demek federasııanyń osy jaýabynan keıin jaqyn arada tennısten Qazaqstan ulttyq quramasy taǵy bir reseılik legıonermen tolyǵatyny belgili bola bastaǵandaı. Qazirdiń ózin­de ulttyq qurama sapyndaǵy reseılik tennısshilerdiń qata­ry az emes. Máselen, erler ara­syndaǵy Devıs kýbogi, áıelder arasyndaǵy Bıllı Djın Kıng syndy komandalyq álem chempıo­nattarynda Aleksandr Býblık, Mıhaıl Kýkýshkın, Andreı Go­lýbev, Elena Rybakına, Iýlııa Pýtınseva sekildi soltústiktegi kór­shimizdiń ókilderi óner kór­setip júr.

Jalpy, Aleksandr Shevchen­konyń Qazaqstannyń kók pas­portyn alýyna myna jaǵdaılar sebep bolýy múmkin. Birinshisi – sportshynyń óz elinde qoldaý tappaýy. Jasyratyny joq, qazirgi tańda Reseıge qaraǵanda Qazaqstan tennıs federasııasy tennıs­shilerge laıyqty deńgeıde qoldaý kórsetip, qamqorlyq tanytyp júr. Máselen, bir ǵana Elena Rybakınanyń ózi Qazaqstanǵa qonys aýdarǵan nebári tórt jyl­dyń ishinde birneshe iri jarysta daralanyp, bıyl áıgili «Úlken dýlyǵa» sanatyndaǵy «Ýımbl­don» týrnırinde bas júldeni oljalady. Árıne, mundaı qysqa ýaqytta úzdikter qatarynan kó­rinýge tek úlken qoldaýdyń ar­qasynda ǵana qol jetkizýge bolatyny túsinikti. Keıde qoldaý bolmasa, talanttyń ózi tabysqa jete almaıtyn kezder bolady.

21 jastaǵy reseılik tennısshi qazirgi tańda óz eliniń altynshy raketkasy sanalady. Onyń al­dynda Danııl Medvedev (4), Andreı Rýblev (8), Karen Hachanov (18), Aslan Karasev (45), Roman Safıýllın (92) jáne Pavel Kotov (96) sekildi tennısshiler tur. Sondyqtan reıtıngte júzdikten tómen ornalasqan Shevchenkoǵa Reseı tennıs federasııasynyń ázirge qolushyn sozyp, kómektese qoıýy ekitalaı.

Ekinshi sebep, álemdegi saıası jaǵdaıǵa baılanysty birqatar sport uıymy reseılik sport­shylarǵa qyryn qarap, túrli ja­rysqa qatysýǵa qatań shekteý qoıyp jatyr. Al olar úshin qazir tyǵyryqtan shyǵatyn jalǵyz jol – ózge eldiń azamattyǵyn alyp, sol memlekettiń týy astynda dodalarǵa qatysý.

Osy oraıda oqyrmandar tarapynan A.Shevchenko Qazaqstan quramasyna qajet pe degen zań­dy saýal týyndaǵany anyq. Iá, ókinishke qaraı, dál qazirgi ýa­qytta Qazaqstan tennıs federasııasy jas ári talantty tennıs­shilerge muqtaj. О́ıtkeni Qazaq­standa álemdik deńgeıde óner kórsetetin tennısshiler shoǵyry qalyptasyp úlgermegen. Qazir bizdiń federasııaǵa jergilikti tennısshi qalyptasyp úlgergenshe Aleksandr Býblıkpen bir deń­geıde óner kórsetip, ulttyq qu­­ramada kóshbasshy bola ala­tyn­daı tennısshi qajet. Al ol orynǵa Shevchenkonyń kan­dıda­týrasy dál kelip turǵan sııaqty. Alaıda federasııa óz málimdemesinde Qazaqstannyń atynan synǵa túsýge nıetti shet­eldik tennısshilerdiń qatary kóp ekenin aıtyp qaldy. Ázirshe biz ol tennısshilerdiń esimderin bilmegendikten, tek reseılik sportshynyń ǵana kandıdatýrasyn aıtyp otyrmyz.

Sondaı-aq Shevchenkonyń aza­mattyq alýyna jerleste­rimizdiń bıylǵy Devıs kýbogin­degi óte súreńsiz oıyny da sebep bolýy múmkin. О́ıtkeni bir Býblıktiń barlyq oıynda jeńiske jete almaıtyny belgili. О́tken aptada ǵana Qazaqstannyń ekinshi raketkasy atanǵan Tımofeı Ska­tov áli álemdik deńgeıdegi oıyn­darǵa daıyn emes. Al ulttyq qurama sapynda 14 jyldan beri oınap júrgen 35 jastaǵy Mı­haıl Kýkýshkınniń kúshi ábden sar­qylyp bitti. Sonymen qatar qazaqstandyq jas talant Beıbit Juqaev ta eresekter arasyndaǵy dodada jarqyrap óner kórsete alar emes. Jýyrda ǵana ol elordada uıymdastyrylǵan Astana Open ATP 500 týrnıriniń negizgi kezeńine qatysyp, birinshi aınalymda álemniń 34-raketkasy nıderlandtyq Botık Van de Zandshýlptiń qarqynyna tótep bere almady – 1:6, 1:6.

Sondyqtan ulttyq quramaǵa jaqyn arada Býblıkke seriktes bolatyn, qajet kezde búkil ja­ýap­kershilikti moınyna ala alatyn bir tennısshi kerek bolyp turǵany anyq. Eger Shevchenko bıyl Qazaqstan quramasyna qo­sylatyn bolsa, onda ol birden elimizdiń ekinshi raketkasyna aınalady. Aldaǵy ýaqytta federasııa osy másele tóńireginde oılanyp, Aleksandrǵa joǵary yqtımaldyqpen azamattyq alyp berýi múmkin. Aıtpaqshy, Alek­sandr Shevchenko Astana Open ATP 500 týrnırinde óner kór­setip, irikteý kezeńderinen sátti ótkenimen, birinshi kezeńde ıtalııalyq Lıýka Nardıden eki sette – 7:6, 6:2 esebimen jeńilip qal­­­ǵan bolatyn. Al ol bul týrnırge jaıdan-jaı qatysýǵa kel­me­geni belgili. Bálkim, osy jarys arqyly federasııa basshyly­ǵynyń kózine túsýdi oılastyrǵan bolýy múmkin.

Aleksandrdyń sporttyq karerasyna toqtalar bolsaq, ol 2000 jyldyń 29 qarashasynda Reseıdiń ońtústigindegi Dondaǵy Rostov oblysynda týyp-ósken. Toǵyz jasynan bastap tennıstiń qyr-syryna qanyǵa bastaǵan Sasha bir jyldan keıin otbasymen Aýstrııaǵa qonys aýdarady. Ol jaqta bilikti bapker Gıýnter Bresnıktiń tennıs akademııasyna qabyldanyp, kúni búginge deıin talaı tennısshiniń juldyzyn jaqqan Gıýnterdiń tálimin alyp keledi. Gıýnter Bresnıktiń eń ataqty shákirti – «Úlken dýlyǵa» sana­tyndaǵy jarystardyń je­ńim­pazy, fınalısi Domınık Tım ekeni kópshilikke málim.

Osyndaı dańqty bapkerden tálim alyp júrgen Shevchenko 2018 jyldan bastap eresekter ara­syndaǵy jarystarǵa qa­tysa bastaǵan. Ázirge ol tek ATP s­a­na­­tyndaǵy Challenger jáne Futuresr týrnırlerinde boı kór­setip, birazynda jeńiske je­tip úlger­di. Atap aıtar bolsaq, ol búginge deıin atalǵan týrnır­ler­de toǵyz márte fınalǵa shyǵyp, so­nyń beseýinde jeńis tuǵy­rynan kórindi. Eń keıingi ret bı­yl Slovakııanyń bas shahary – Bra­tıslavada ótken «Bratıslava open» dodasynda úzdik shyqty. Maý­sym aıynda ǵana 237-orynda turǵan A.Shevchenko osyndaı tabys­­ty óneriniń arqasynda bes aı­dyń ishinde álemdik reıtıngte TOP-150 tennısshiniń qataryna qosyldy.

Aleksandr Shevchenkonyń en­digi maqsaty – jyl sońyna deıin TOP-110 tennısshiniń qata­ryna enip, 2023 jyldyń qańtar-aqpan aılarynda ótetin «Úlken dýlyǵa» sanatyndaǵy Aýstralııa ashyq chempıonatynyń negizgi kezeńinde óner kórsetý.