Saılaý dúbiri bastalyp, saıasat seńi qozǵala bastaǵany Almatyda anyq seziledi. Saıası naýqan qarsańynda bıylǵy 27 qyrkúıekte «Qazaqstan zańgerler odaǵy» respýblıkalyq qoǵamdyq birlestigi alańynda «Ádil saılaý úshin» shtaby qurylǵan bolatyn. Shtab kezekten tys Qazaqstan Respýblıkasy Prezıdentiniń saılaýy týraly zańnamanyń negizgi erejelerin túsindirýge, saılaý úderisine qatysýshylarǵa quqyqtyq kómek kórsetýge tıis.
Taıaý kúnderi «Qazaqstan zańgerler odaǵy» Almaty fılıalynyń tóraǵasy ári «Ádil saılaý úshin» qalalyq shtabyn basqaratyn Baýyrjan Maqulbaevtyń qatysýymen baspasóz jıyny ótti. Otandyq jáne sheteldik tanymal zańgerler engen shtab músheleri saılaý naýqanynyń barysyn quqyqtyq monıtorıngileý jáne saılaý úderisine qatysýshylarǵa saılaý zańnamasyn qoldaný tártibin túsindirýdi kózdeıdi.
Baýyrjan Maqulbaev saılaý naýqanyn monıtorıngileý barysynda BAQ, úkimettik emes jáne halyqaralyq uıymdarmen ózara áreket jandana túsetini týraly baıandaı kele, baıqaýshylardyń da mindetin jiktep: «Qazaqstan Respýblıkasynyń azamaty baıqaýshy bolý úshin 18 jastan asqan jáne saıası partııalardan, ózge de qoǵamdyq birlestikterden, kommersııalyq emes uıymdardan baıqaýshy ókilettigi bolýy kerek», dedi.
Sońǵy kúnderi atalǵan qozǵalystyń jumysy jandana túskeni baıqalady. Sársenbi kúni Ál-Farabı atyndaǵy Qazaq ulttyq ýnıversıtetinde «Ádil saılaý úshin» shtaby músheleriniń «Azamattardyń saılaý quqyqtarynyń konstıtýsııalyq kepildikteri» taqyrybynda úkimettik emes uıymdar ókilderimen, oqytýshy-professorlar quramymen jáne bilim alýshy jastarmen kezdesýi ótti.
Sharany QazUÝ-dyń zań fakýltetiniń kafedra meńgerýshisi, professor Alýa Ibraeva ashyp, zańgerlerdiń saılaýaldy mindetine toqtaldy.
«Qoǵamda demokratııany damytýda saılaý mańyzdy ról atqarady. Bul konferensııanyń ózektiligi – jurtshylyq, ǵalymdar, sarapshylar saılaý týraly zańnamany jetildirý úderisine belsene atsalysady. Ǵalymdardyń usynysy zań shyǵarýshy bılikke asa qajet», dedi Alýa Ibraeva.
Zań fakýltetiniń dekany, professor Dáýlet Baıdeldınov azamattardyń saılaý quqyqtarynyń konstıtýsııalyq kepildikteri týraly aıtty. «Kezekten tys prezıdent saılaýy halyqtyń demokratııalyq ózgeristerdi keńeıtýge degen senim mandatyn alý úshin qajet. Bul qazaqstandyqtar ómiriniń barlyq salasyna qatysty», dedi spıker.
Shtab múshesi, belgili zańger ǵalym Ermek Ábdirasulov konstıtýsııalyq reformanyń, saılaý zańnamasynyń jáne saılaý úderisin uıymdastyrýdyń negizgi erejelerin túsindirdi. Ol: «Saılaýda óz ustanymyn bildirý – barlyq azamattyń aldynda turǵan mindet. Ol – halyqtyń memleket isterin basqarýǵa jáne jańa, ádil Qazaqstandy qurýǵa belsendi qatysýynyń kórsetkishi. Jastar – memleketimizdiń mańyzdy saılaý resýrstarynyń biri, olar – elimizdiń bolashaǵy! Sondyqtan jastarǵa saıası ómirge degen belsendilik pen óz erik-jigerin bildirýdi kórsetý kerek», dedi.
Jıynda sóz alǵan professor Erkin Dúısenov saılaý zańnamasyn jańǵyrtý qajettigin alǵa tartyp, saılaý úderisiniń qyr-syry tóńireginde oı órbitti. Baıqaýshylardyń saılaý úderisine qatysýy, olardyń quqyqtary men mindetteri, sondaı-aq Qazaqstan Respýblıkasynyń prezıdenttigine kandıdattardy usyný erekshelikteri týraly maǵlumattar jıynǵa qatysýshylar tarapynan úlken qyzyǵýshylyq týdyrdy.
Ýnıversıtet basshylyǵy, oqytýshy-professorlar shtab jumysynyń mańyzyn atap ótip, qolǵa alynǵan sharalarǵa qoldaý tanytty.
ALMATY
