Qazaqstannyń EAEO elderimen ózara saýda-sattyǵy osy jyldyń 8 aıynda $17 mlrd-tan asty, bul ótken jyldyń sáıkes kezeńimen salystyrǵanda 5%-ǵa artyq.
Birlestik qurylǵan sátten bastap Qazaqstan Odaq elderine óńdelgen ónimniń eksportyn 64%-ǵa ulǵaıtty, onyń ishinde nomenklatýrada daıyn taýarlardyń úlesi artyp keledi.
«EAEO-ǵa múshe elderdiń memlekettik satyp alýlarynda ulttyq rejımderdiń jumys isteýine qatysty máseleni sheshý qajet. «Tehnıkalyq jáne tehnologııalyq talaptar, jergilikti jaǵdaı, tipti geografııalyq shekteýler – seriktes elderdiń memlekettik satyp alýlaryna qatysý kezinde kásiporyndardyń aldynan shyǵatyn kedergilerdiń tolyq tizimi bular ǵana emes», dedi Álıhan Smaıylov.
Ol 2020 jyly taýarlar óndirisine qoıylatyn jalpy talaptardyń biryńǵaı erejeleri qabyldanǵanyn, biraq 2 jylǵa jeter-jetpes ýaqyt ishinde olar birneshe ret ózgertilip, tolyqtyrylǵanyn aıtty.
Álıhan Smaıylovtyń pikirinshe, mundaı jaǵdaı kóbine Erejelerdi aınalyp ótetin qosymsha talaptardyń qoıylatynyna baılanysty bolyp otyr.
Sonymen qatar Premer-Mınıstr EAEO elderin kólik quraly pasportynyń biryńǵaı formalaryn engizý jáne elektrondyq pasporttar júıesin uıymdastyrý jónindegi jumysty jedeldetýge, sondaı-aq Odaqtyń ortaq naryǵynyń tıimdiligine tikeleı áser etetin tehnıkalyq reglamentterdi ózektendirýge shaqyrdy.
Erevanǵa jumys sapary aıasynda Premer-Mınıstr EAEO elderi Úkimet basshylarynyń Armenııa Prezıdenti Vaagn Hachatýrıanmen birlesken kezdesýine de qatysty.
