Aqyn, Parlament Májilisiniń depýtaty, Halyqaralyq S.Esenın atyndaǵy syılyq – «Altyn kúz» ordeniniń ıegeri, Halyqaralyq «Alash» ádebı syılyǵynyń laýreaty Qazybek Isanyń 60 jasqa tolýyna oraı týǵan jeri Shardara men Túrkistan, Shymkent qalalarynda mereıtoıy atalyp ótti. Aqynnyń Shardara qalasynda ótken shyǵarmashylyq keshine ádebıetshi, fılologııa ǵylymdarynyń doktory Qulbek Ergóbek, Májilis depýtaty Serik Erýbaev, «Aq jol» partııasy qarjylyq-revızııalyq komıssııasynyń tóraǵasy Bolat О́tepbaev, aqyn Suraǵan Rahmet, aqyn Almas Ahmetbekuly syndy zııaly qaýym ókilderi men ózge de qonaqtar qatysty.
Kesh aýdandyq Mádenıet úıiniń aldynda ornalasqan Abaıdyń eskertkishine gúl shoqtaryn qoıýdan bastaldy. Sondaı-aq keshke qatysýshylar Q.Isa shyǵarmashylyǵyna arnalǵan kórmeni tamashalady. Is-shara barysynda jerlesteri aqynǵa qurmet kórsetip, aqboz at mingizdi. Sonymen qatar keshke kelgen el aǵalary men arqaly aqyndar quttyqtaý sóz sóılep, estelikter aıtyp, arnaý óleńderin oqydy. Keshte sóz alǵan aýdan ákimi Qaırat Joldybaı:
– Qazaq tiliniń mártebesin kóterý boıynsha atqarylyp otyrǵan jumystaryńyzdy halyq kórip, baqylap otyr. Qazir Parlament Májilisinde atqaryp otyrǵan jumystaryńyzdy el-jurtyńyz shyn júrekten qoldaıdy dep bilemin. Elimizdiń ósip-órkendeýi, rýhanı túleý, qazaq tiliniń mártebesin kóterý jolyndaǵy qadamdaryńyz alǵa basa bersin. El alǵysyna bólene berińiz, – dep aqjarma tilegin bildirdi.
Qalyń kópshiliktiń júzinen týǵan topyraǵynan túlep ushqan aqynǵa degen alpamsa sezim, aq adal yqylas baıqalady. «Bul án burynǵy ánnen ózgerek» degendeı, kesh qurylymy shynaıy, áserli ótti. Kesh ortasynda esimi qalamger qurmetine Qazybek dep qoıylǵan on shaqty bala shyǵyp, aqyn jyryn jatqa oqydy. Mynadaı qurmetke arqasy qozyp, kóńili tebirengen Qazybek aqyn ózi de balalardyń ortasynda turyp jyr oqydy. Shirkin-aı, adam tabıǵaty, júregi, sezimi, nıeti degendi qoısańshy. Odan asqan qandaı kúsh, qandaı qundylyq bolýy múmkin? Ataq satyp alsań da, qurmet satyp ala almaısyń. Shardara halqynyń aqynǵa degen qurmeti kisi kóńilin tolqytyp, oıǵa qaldyrdy.
Munan soń uzyna sozylǵan merekelik sherý jolǵa shyǵyp, Qazybek Jarylqasynulynyń týǵan aýyly Qyzylqumǵa bet aldy. Jolaı Uzyn ata kesenesine bas buryp, qasıetti babamyzdyń, kesene mańyndaǵy qazaq úshin qan qasap zamandarda ter tókken batyrlarymyzdyń rýhyna Quran baǵyshtaldy. Qyzylqum aýylyndaǵy aqyn bilim alǵan orta mektepte oqýshylar shurqyraı qarsy alyp, Qazybek Isa atyndaǵy synypta óleń oqyldy. Qanatyn qomdap, qııaǵa ushqan perzentin ulyqtaǵan bilim ordasy sárýar sóz sóılep, alǵysyn jetkizdi. Izin ala Arystan bab kesenesine táý etken delegasııa kıeli Túrkistan qalasynda bolyp, kesh jalǵasyn tapty. Aldymen kelgen qonaqtar kitap kórmesin tamashalap, Túrkistan maqamdary negizinde jaryq kórgen «Tekti sózdiń tóresi» termeler jınaǵynyń tusaýyn kesti. Odan soń mereıtoı ıesine arnalǵan «Táýelsizdik tarlandary» derekti fılminiń kórsetilimi ótti. Aqynnyń týǵan jeri shaǵalaly Shardaradan bastaý alyp, Túrki áleminiń rýhanı astanasy Túrkistanda jalǵasyn tapqan keshti ǵalym, ádebıet synshysy Qulbek Ergóbek júrgizip otyrdy. Túrkistan oblysy ákiminiń orynbasary Sáken Qalqamanov óńir basshysynyń quttyqtaýyn jetkizip, aqynǵa qurmet kórsetti. Budan ári R.Seıtmetov atyndaǵy Túrkistan sazdy-drama teatrynyń ártisteri Qazybek Isanyń óleńderin naqyshyna keltirip oqydy.
Munan soń mereıtoı shyraıly Shymkent qalasynda jalǵasyn tapty. Túrkistan saraıy kórermenge tolyp, aqynnyń óleńderi oqylyp, ánderi shyrqaldy. Qazybek Isanyń birneshe óleńine án jazǵan belgili kompozıtor Qaldybek Qurmanáli qalamgerdiń kisilik kelbetin ashyp, ana sútimen daryǵan abzal qasıetterin baıan etti. Kesh sońy aqynnyń jańa óleńin oqýymen qorytyndy-
landy.
Aqyndyq – tylsymmen astasqan aspanı álem. Shyn talanttyń irgetasy ádilet pen erkindik, ar men uıat, adamdyq pen ynsap arqyly qalanbaq. «Aqyn bolý óz erkiń, azamat bolý mindetiń» degendeı, Qazybek Isa ádilet úshin kúresip, ult qundylyqtaryn túgendep júrgen aqyn. Aqyn joly – keshegi sarǵaıyp atyp sáskede sóngen Alash arystarynyń joly, ardyń joly. Elim dep emirengen aǵyl-tegil bul júrek – týǵan jeriniń túngi ottaryndaı ult shańyraǵyna sáýlesin túsire bereri talassyz aqıqat.
