Júlde ıegerlerine 50 AEK kóleminde bir rettik (159 myń teńge) syıaqy berildi. Respýblıka kúni qarsańynda oblys ákimi Ábilqaıyr Sqaqov syılyq laýreattaryn quttyqtap, el bolashaǵy jastar qolynda ekenin atap ótti.
– Osydan 32 jyl buryn elimizdiń egemendigin pash etken tarıhı kún bıyl basty merekege aınaldy. Ulttyq mereke qarsańynda «Táýelsizdik ulany» belgisiniń 100 ıegeri marapatqa ıe boldy. Barshańyzdy jeńisterińizben quttyqtaımyn. Elimizdiń bolashaǵy ózderińiz sııaqty órenderdiń qolynda, – dedi óńir basshysy.
Baıqaýǵa qatysýǵa jeti júzden astam ótinish kelip túsken. Jeńimpazdardy anyqtaý úshin táýelsiz qazylar alqasy qurylyp, nátıjesinde «Táýelsizdik ulany» syılyǵynyń 100 laýreaty anyqtaldy. Mysaly, «Áleýmettik mańyzy bar jáne qoǵamdyq qyzmet» nomınasııasynda belsendi azamattyq kózqarasy úshin 4 mektep oqýshysy men 1 kolledj stýdenti marapattaldy, 20-dan astam pavlodarlyq óren «Ǵylymı-tehnıkalyq shyǵarmashylyq jáne oqýshylyq-zertteý jumys» nomınasııasynda jeńiske jetti. Taǵy 20 bala sporttaǵy jetistigi, kásiptik jáne shyǵarmashylyq sheberligi úshin marapattaldy.
О́z kezeginde syılyq ıegeri, Pavlodar qalasyndaǵy № 8 mektep-lıseı oqýshysy Antonına Stepanova óskeleń urpaqqa qoldaý kórsetken oblys basshysyna alǵys aıtty.
– Respýblıka kúni qarsańynda «Táýelsizdik ulany» syılyǵyna qol jetkizý men úshin zor mártebe. Bul meniń ǵana emes, maǵan Otandy súıýdi úıretken ata-anam men muǵalimderimniń de jetistigi. Bul sátti jetistikterim joǵary deńgeıde baǵalanǵan kún retinde máńgi este saqtaımyn, – dedi mereıi ósken oqýshy.
Al daryndy balalarǵa arnalǵan Abaı atyndaǵy gımnazııanyń 11-synyp oqýshysy Álisher Dabylhan óńir basshysyna Respýblıka kúnine oraı chellendj bastaýdy usyndy. Ábilqaıyr Sqaqov mektep oqýshysynyń bastamasyn qabyl alyp, Muzafar Álimbaevtyń óleńin oqydy. Sóıtip «Qadirli Qazaqstan, Otan-Ana» aksııasyna muryndyq boldy. Chellendjdi jalǵastyrý óńirdiń barlyq mektep oqýshylary men jastaryna berilip otyr.
Kesh sońynda jastar «Jasa, Qazaqstan» ánin birge shyrqady.
Pavlodar oblysy
