Qala men aýdandarda birqatar áleýmettik qurylys nysandary ashylady. Balalar jyly aıasynda demeýshiler qoldaýymen salynyp jatqan 80 oıyn alańynyń 67-si paıdalanýǵa beriledi. Sonymen qatar qalalyq avtobýs parki jańa kóliktermen tolyqtyrylady. Jalpy 17-30 qazan aralyǵynda josparlanǵan merekelik is-sharalar halyqtyq sıpatta ótedi.
Mereke qarsańynda Jańaqorǵan aýdanynda jańa demalys parki el ıgiligine berildi. Oblys ákimi Nurlybek Nálibaev mádenı nysandy aralap, turǵyndar qýanyshyna ortaqtasty. Oblys basshysy aýdan halqymen kezdesýde ulttyq mereke aıasynda óńirde júzege asatyn jańa bastamalar týraly aıtty.
– Týǵan jerine tileýles, ortaq iske janashyr kásipker azamattardyń qoldaýymen aımaǵymyzda jańa nysandar boı kóterip keledi. Búgin turǵyndar serýen quryp, oı sergitip, boı jazýyna múmkindik beretin jańa demalys parki paıdalanylýǵa berildi.
Munan bólek, Balalar jylyna syı retinde qala, aýdandarda 80 oıyn alańy salynyp, basym bóligi qoldanysqa berilip jatyr. Sonyń ishinde Jańaqorǵan aýdanynda 10 shaǵyn sport alańqaıy qazan aıynyń sońyna qaraı ashylady, dedi aımaq basshysy.
О́zge aýdan ortalyqtarynda kezdese bermeıtin park belgili kásipker Marlen Ysqaqov jetekshilik etetin «Azımýt-M» jaýapkershiligi shekteýli seriktestiginiń qarjysy esebinen salyndy. Jalpy, quny 790 mln teńge bolatyn parkte turǵyndardyń keshki ýaqytta taza aýamen tynystap, saýyq quryp, serýendeýine bar jaǵdaı jasalǵan. Túrli attraksıondar, sýburqaq, jazǵy sahna, balalardyń oıyn alańdary aýdan turǵyndarǵa qyzmet kórsetedi.
Aldaǵy ýaqytta park ishinen balalarǵa arnalǵan kafe jáne neke saraıy salynbaq.
Demalys parki alańynda oblys ákimi halyqpen kezdesý ótkizdi. Basqosý barysynda Nurlybek Nálibaev aýdan jurtyn alańdatyp kelgen máseleler ret-retimen sheshimin tapqanyn tilge tıek etip, aýyl turǵyndarynyń suraqtaryna jaýap berdi.
– Memleket basshysynyń qoldaýymen óńirde aýqymdy jobalardy qolǵa aldyq. Az ýaqyttyń ishinde túrli deńgeıde ınvestısııa tartyp, qomaqty jobalarǵa respýblıkadan qarjy ákelip, kókeılerińizde júrgen kóp máseleni sheshýge jol taptyq.
Qazirgi tańda Jańaqorǵan aýdanyndaǵy oblystyq, aýdandyq mańyzy bar joldar máselesi sheshimin tapty deýge bolady. Bul maqsatqa 180 mln teńge qarajat bólindi. Endi tek aýylishilik joldar máselesi ǵana qalyp tur. Ony da ret-retimen jasaımyz. Al bilim salasyndaǵy «Jaıly mektep» ulttyq jobasy sheńberinde 19,5 mlrd teńgege jańa mektepter salamyz. Zamanaýı úlgidegi 600 jáne 300 oryndyq 2 mektep osy Jańaqorǵannan boı kóteredi, – dedi oblys ákimi.
Baıkenje aýyly turǵyndarynyń tilegine oraı jańa bilim oshaǵyn turǵyzýǵa oblystyq bıýdjetten 100 mln teńge bólinip, qurylysy kelesi jyly bastalady.
Oblys eldi mekenderin gazdandyrý aıasynda bıyl aýdandaǵy Birlik pen Qyrash aýyldary «kógildir otynǵa» qosylady, oǵan 800 mln teńgege jýyq qarajat bólindi. Kelesi jyly taǵy 5 eldi mekendi qosý josparda tur.
Qyzylorda
