Osylaısha, Ortalyq saılaý komıssııasy Qazaqstan Respýblıkasynyń prezıdenttigine 6 kandıdatty tirkedi. Olar – Qasym-Jomart Toqaev, Meıram Qajyken, Jıgýlı Daırabaev, Qaraqat Ábden, Saltanat Tursynbekova jáne Nurlan Áýesbaev. Úmitkerlerdiń bireýi – memlekettik qyzmetker, bireýi – kommersııalyq qurylymnyń ókili, tórteýi – úkimettik emes sektordyń ókili, onyń bireýi saıası partııanyń ókili.
Otyrysta Ortalyq saılaý komıssııasynyń múshesi Anastasııa Shegorsova 21 qazan saǵat 18.00-den bastap saılaý aldyndaǵy úgit bastalǵanyn habarlady. Ol 19 qarasha saǵat 00:00-ge deıin jalǵasady. Atap ótilgendeı, saılaý aldyndaǵy úgit úsh jolmen júzege asyrylady: 1) buqaralyq aqparat quraldary arqyly; 2) saılaý aldyndaǵy jarııa is-sharalardy ótkizý arqyly; 3) baspa,
aýdıovızýaldy jáne ózge de úgit materıaldaryn shyǵarý jáne taratý arqyly.
Anastasııa Shegorsova Ortalyq saılaý komıssııasy «Qazaqstan Respýblıkasyndaǵy saılaý týraly» Konstıtýtsııalyq zańǵa sáıkes Prezıdenttikke kandıdattardyń saılaý aldyndaǵy pikirsaıystaryn uıymdastyryp, olardy ótkizý tártibi men sharttaryn belgileıtinin aıtty. Ortalyq saılaý komıssııasynyń qaýlysymen saılaý aldyndaǵy televızııalyq pikirsaıystar men pikirtalastar osy jylǵy 11 qarashada «Habar» telearnasynyń efırinde ótedi dep bekitildi.
Ortalyq saılaý komıssııasynyń hatshysy Muhtar Erman búgingi tańda 4 halyqaralyq uıym men 4 shet memleketten 76 halyqaralyq baıqaýshy akkredıttelgenin habarlady. Shet memleketter men halyqaralyq uıymdardyń baıqaýshylaryn akkredıtteý 2022 jylǵy 14 qarasha saǵat
18:00-ge deıin jalǵasady.
