Tóraǵa orynbasary óz sózinde Aral apaty aımaqtyq ta, jahandyq deńgeıde de sheshýdi talap etetin qazirgi zamandaǵy ózekti máselelerdiń biri retinde BUU-da tanylǵanyn atap ótti.
«Qazaqstan men О́zbekstan Aral teńizi basseınindegi ekologııalyq jáne áleýmettik-ekonomıkalyq daǵdarysty eńserýde birlesken kúsh-jiger jumsap keledi. Eki eldiń prezıdentteri Aral óńirindegi ózekti máselelerdi jedel sheshýdi, transshekaralyq sý resýrstaryn utymdy paıdalanýdy jáne qorshaǵan ortany qorǵaýdy júıeli túrde aıtyp otyr. О́tip jatqan forýmdy biz eki el, onyń ishinde parlamenttik baılanystar aıasynda júrgizilip jatqan jumystardyń zańdy jalǵasy retinde qarastyramyz», dedi Tóraǵa orynbasary.
Depýtat Aqmaral Álnazarova da Aral óńirindegi klımattyń áserin jáne tabıǵı ortanyń azyp-tozýyn azaıtý maqsatynda Syrdarııa ózeni men Soltústik Aral teńizin saqtaý máselelerin sheshýde jalpyǵa birdeı qabyldanǵan halyqaralyq konvensııalar men standarttarǵa sáıkes túbegeıli qadamdar qajettigin atap ótti.
«Ekonomıkanyń barlyq salasynda klımattyń ózgerýine beıimdelý sharalaryn qabyldaý qajet, ásirese aýyl sharýashylyǵynda sý únemdeý tehnologııasy men ylǵaldy az qajet etetin daqyldarǵa kóshý kerek. Taıaý jyldarda qurǵap qalǵan teńiz túbiniń jalańash jerlerine orman ósirý, mal sharýashylyǵyn damytý úshin sýy ózdiginen shyǵatyn uńǵymalardyń aınalasynda oazıs júıesi jasalýy qajet. BUU qamqorlyǵy aıasynda tereń zertteýler júrgizip, tıisti usynymdar ázirlenýi kerek», dep atap ótti senator A.Álnazarova.
Konferensııaǵa О́zbekstan Respýblıkasy Olıı Májilisi Senaty Tóraǵasynyń orynbasary Sodık Safoev, DDU Eýropalyq bıýrosynyń basshysy Hans Klıýge, USAID jobasynyń jetekshisi Ekaterına Strıkeleva qatysyp, sóz sóıledi.
