Aıta ketý kerek, Memleket basshysy Qasym-Jomart Toqaev Ulttyq quryltaıdyń birinshi otyrysynda Respýblıka kúnine ulttyq mereke mártebesin qaıtarýdy usynǵan bolatyn.
Is-sharaǵa Parlament Májilisiniń depýtattary, Aqparat jáne qoǵamdyq damý, Mádenıet jáne sport mınıstrlikteriniń basshylary, sonymen qatar Astana qalasy ákimdiginiń ókilderi qatysty.
Respýblıkalyq týrnırdi Májilis tóraǵasynyń orynbasary P. Kazansev ashyp berdi. Vıse-spıker jarysqa qatysýshylardy Respýblıka kúnimen quttyqtap, mundaı týrnırdiń alǵash ret uıymdastyrylyp otyrǵanyn aıtyp, sáttilik pen jeńis tiledi.
– Respýblıka kúni merekesiniń árbir qazaqstandyq úshin mańyzy erekshe. Bul kún el egemendiginiń bastaýy boldy. Búgin osy merekege oraı jarys ótkizip otyrmyz. Depýtattar korpýsy men jýrnalıster halyqtyń máselesin birge kóteretin, kúndelikti ómirde belsendi jumys isteıtin odaqtastar, – dedi vıse-spıker.
Aqparat jáne qoǵamdyq damý mınıstri D.Qydyráli sóz sóılep, Respýblıka kúni qarsańynda uıymdastyrylyp jatqan is-sharanyń mańyzdylyǵyna toqtaldy.
– Araıly azattyǵymyzdyń, tuǵyrly táýelsizdigimizdiń sımvoly bolǵan Respýblıka kúnimen quttyqtaımyn. Osyndaı uly mereke qarsańynda týrnırdi uıymdastyrýǵa bastamashylyq jasaǵan Májiliske, Májilis tóraǵasy Erlan Qoshanovqa alǵys bildiremin. Biz jýrnalıster qaýymy jarysa otyryp, jarasamyz. Dop talastyra otyryp, tabysamyz. Búgingi týrnır dostyqtyń belgisi bolady, – dedi D.Qydyráli.
Respýblıkalyq týrnırge Atyraý, Pavlodar, Soltústik Qazaqstan, Qaraǵandy, Shyǵys Qazaqstan, Jetisý oblystary men Astanadan kelgen 20-dan astam jýrnalıster komandasy, sondaı-aq Májilis depýtattary men qyzmetkerleri qatysýda.
Týrnır elordamyzdyń «Astana-Arena» stadıonynda ótip jatyr.
