Bul taraptaǵy tutynýshylardyń ókpe-nazyn saraptap qarasańyz, elektrondy saýda, turmystyq qyzmet kórsetý, qoǵamdyq tamaqtandyrý salalaryna qatysty shaǵym aıtýshylardyń qarasy kúrt kóbeıgen. Tutynýshylar quqyn qorǵaý departamenti árbir aryz-shaǵymǵa muqııat qarap, taldaý jasaýda. 680 ótinishtiń 447-si jedel qaralyp, tutynýshylarǵa 21 mln teńgeden asa qarjy qaıtarylǵan. Alǵan zaty kóńilden shyqpaı opynǵan 111 adam sapasyz taýarlaryn aıyrbastap alý múmkindigine ıe bolypty. Buqaralyq aqparat quraldarynda bul taraptaǵy alaıaqtyqtan abaı bolý kerektigi qanshama ret aıtylsa da, ońaı jem bolyp júrgenderdiń qatary azaıar emes.
– Keıingi ýaqytta tutynýshylardyń aryz-shaǵymdary kóptep kelip jatyr, – deıdi tutynýshylar quqyǵyn qorǵaý departamentiniń basshysy Svetlana Zanegına, – olardyń deni sapasyz ónim tóńireginde bolyp keledi. Onyń ústine saýdalanǵan taýarlardyń ýaqytynda jetkizilmeıtindigi bar. Saýda buzylǵannan keıin keıbireýlerdiń qolma-qol aqshasyn ýaqytynda qaıtarmaı, dińkesin qurtady. Jyl basynan beri departamentke ınternet dúkenderdiń aqshalaı qarajatty qaıtarmaýyna oraı 44 tutynýshy shaǵym aıtyp keldi.
Árıne, zaman talabyna saı ınternet dúkenderdiń artyqshylyǵy da bar. Aıtalyq, ýaqyt únemdeý, baǵany baqylaý jáne salystyryp qaraý tárizdi jaılar. Shynyn aıtý kerek, kóp jaǵdaıda ınternet dúkenderdegi taýar quny kádýilgi dúkenderge qaraǵanda birshama arzan ári tutynýshyǵa tıimdi aksııalardy da jıi ótkizedi.
Kemshilik te az emes. Jalǵan saıttarda kózdiń jaýyn alatyn nebir taýar sýretteri syńsyp tur. Satýshy alysta bolǵandyqtan kózben kórip, qolmen ustaı almaısyń. Sondyqtan keı tusta ańqaý jurttyń alaıaqtarǵa ońaı jem bolyp jatatyndyǵy da kezdesedi. Olar aldyn ala 100 paıyz aqsha tóleýin suraıdy. Keıin ustatpaı ketýi de múmkin. Sóıtip, jańa zamannyń jetistigin ózderiniń aram pıǵyldaryna paıdalanýdy maqsat etken alaıaqtar tutynýshynyń taýar úshin tólegen aqshasyn alyp alǵannan keıin áleýmettik jelidegi akkaýntyn óshirip nemese buǵattap tastaıdy. Mundaı alaıaqtardy tabý tutynýshyǵa tipti de múmkin emes.
Qoldanystaǵy zańnamada ınternet dúkenderi men olardyń tynys-tirshiligin qamtıtyn bir ǵana bap kózdelgen. Sondyqtan onlaın satýshylar zańnamanyń olqylyǵyn paıdalanyp, tutynýshylar quqyǵyn buzatyn jaǵdaılar jıi kezdesedi. Demek olqy túsip jatqan osy bir tusty rettep alsaq, támam jurt ońaı oljaǵa kenelip júrgen alaıaqtarǵa jem bolmas edi.
Kókshetaý
