Ǵylymı is-sharaǵa PPÝ ǵylymı jumys jáne halyqaralyq baılanystar jónindegi prorektory Baýyrjan Esengeldın, stýdentter, magıstranttar men doktoranttar qatysyp baıandama jasady. Spıkerler ǵylym jáne joǵary bilimdi damytý, oqýshyǵa sapaly bilim berýdiń tıimdi joldaryn tabý baǵytynda ázirlegen jańa jobalary men ózekti usynystaryn ortaǵa saldy.
– Barshańyzǵa belgili, 16 shilde kúni ótken Ulttyq quryltaıda el Prezıdenti Qasym-Jomart Toqaev Respýblıka kúnin qaıtaryp, ulttyq mereke mártebesin berý jaıynda usynys bildirdi. Osy usynys kópshiliktiń qoldaýyna ıe bolyp, ulttyq merekeler men ataýly kúnder kúntizbesine jańa ózgeris engizý jóninde sheshim qabyldandy. Osy mereke tarıhyna bir sholý jasar bolsaq, 1990 jyly 25 qazanda Qazaqstannyń Memlekettik egemendigi týraly deklarasııa qabyldandy. Bul el táýelsizdiginiń alǵashqy qadamy bolatyn. Osyǵan oraı Respýblıka kúni elimizdiń memleketti qurý jolyndaǵy tarıhı qadamynyń sımvoly bolýy kerek degen pikir týyndady. Osylaısha, bul kún ulttyq mereke etip belgilendi. Negizi, elimizdiń táýelsizdigi osy kúnnen bastalady. Barshańyzdy Qazaqstannyń árbir azamaty úshin mańyzy zor Respýblıka kúni merekesimen quttyqtaımyn. Osy saltanatty kúnde barshańyzǵa ıgilik pen baqyt tileımin! – dedi Baýyrjan Satybaldyuly.
Konferensııada «Tarıh» bilim berý baǵdarlamasynyń doktoranty Arman Omarov «Ahmet Baıtursynulynyń pedagogıkalyq kózqarastary» taqyrybynda baıandama jasady. Al «Pedagogıka jáne psıhologııa» bilim berý baǵdarlamasynyń ekinshi kýrs magıstranty Sanııa Abıldınova «Mektepke deıingi jastaǵy balalardyń sóıleý tilin oıyn tehnologııalary arqyly túzetý» taqyrybyndaǵy zertteýin ortaǵa salyp, óz tájirıbesimen bólisti. Sondaı-aq «Matematıka» bilim berý baǵdarlamasynyń ekinshi kýrs magıstranty Iran Jańabek jáne MFkS-21 tobynyń stýdenti Erkejan Qarshyǵanova baıandamalar jasady.
Pavlodar pedagogıkalyq ýnıversıtetiniń baspasóz qyzmeti
