Olar – «Raqymshylyq jasaý týraly» jáne «Eýrazııalyq ekonomıkalyq odaqtyń tehnıkalyq reglamentteri talaptarynyń saqtalýyna memlekettik baqylaýdy (qadaǵalaýdy) Eýrazııalyq ekonomıkalyq odaqqa múshe memleketterdiń kórsetilgen saladaǵy zańnamasyn úılestirý maqsatynda júzege asyrý qaǵıdattary men tásilderi týraly kelisimdi ratıfıkasııalaý týraly» zań jobalary.
Senat Tóraǵasy Máýlen Áshimbaev Memleket basshysynyń qańtar oqıǵasyna qatysýshylarǵa raqymshylyq jasaý týraly bastamasy gýmanızmniń jáne izgiliktiń jarqyn kórinisi ekenin atap ótti.
«Memleket basshysy óz Joldaýynda qańtar oqıǵasyna qatysýshylarǵa bir rettik raqymshylyq jarııalaýdy tapsyrdy. Soǵan baılanysty bir top Parlament depýtaty tıisti zań jobasyna bastamashyldyq jasady. Aldaǵy ýaqytta qajetti jumystardy atqaryp, qorytyndylaryn alyp, atalǵan zańdy barynsha tezirek qabyldaýymyz kerek», dedi Máýlen Áshimbaev.
«Raqymshylyq jasaý týraly» zań jobasynyń normalary qylmystyq teris qylyqtar, onsha aýyr emes jáne aýyrlyǵy ortasha qylmystar jasaǵandardy jazadan bosatýdy kózdeıdi. Mundaı qylmystar úshin jazasyn ótegenderden sottylyǵy alynady. Zań jobasy arqyly aýyr qylmys jasaǵandar úshin sot taǵaıyndaǵan jaza – tórtten úshke, al asa aýyr qylmystar úshin jartysyna qysqartylady.
Sondaı-aq zań jobasynda bosatylatyn adamdardy jumysqa ornalastyrý, olarǵa medısınalyq kómek kórsetý jáne qujattaryn resimdeýdi kózdeıtin, ıaǵnı qaıta áleýmettendirýdi qamtamasyz etetin normalar bar. Aıta ketý kerek, azaptaýlar jasaǵandar, terrorıster, ekstremıster, resıdıvıster jáne tártipsizdikterdi uıymdastyrýshylar raqymshylyqqa jatpaıdy.
«Eýrazııalyq ekonomıkalyq odaqtyń tehnıkalyq reglamentteri talaptarynyń saqtalýyna memlekettik baqylaýdy (qadaǵalaýdy) Eýrazııalyq ekonomıkalyq odaqqa múshe memleketterdiń kórsetilgen saladaǵy zańnamasyn úılestirý maqsatynda júzege asyrý qaǵıdattary men tásilderi týraly kelisimdi ratıfıkasııalaý týraly» zań jobasy atalǵan salada múshe memleketterdiń zańnamasyn úılestiredi.
Kelisimde qaýipti ónim týraly aqparattandyrý júıesiniń jumysyn qamtamasyz etý qarastyrylǵan. Sol arqyly EAEO-nyń tehnıkalyq reglamentteriniń talaptaryna sáıkes kelmeıtin ónim týraly málimetter almasý júrgiziledi.
Sonymen qatar Bıýro músheleri Májilisten kelip túsken zań jobalaryn Senattyń turaqty komıtetterine bólip berdi.
