Qaýipsizdik tehnıkasy boıynsha nusqaýlyqpen tanysqannan keıin Meıram Qajyken kúndizgi aýysym jumysshylarymen birge shahtaǵa tústi. Kandıdat sý aǵyzý ýchaskesinde jáne taý-ken mehanızmderin jóndeý pýnktinde boldy. Úmitker shahterlerdiń eńbek jaǵdaılarymen tanysyp, saýaldaryna jaýap berdi.
Aıta keterligi, Annenskıı shahtasynyń eń tómengi núktesi 500 metrden astam tereńdikte ornalasqan. M.Qajyken óziniń saılaýaldy baǵdarlamasynyń basym baǵyttaryn kenshilerge teńiz deńgeıinen 260 metr tómen tereńdikte túsindirdi. Eńbekkerlerdi negizinen áleýmettik qorǵaý jáne zeınetkerlik jasyn tómendetý máseleleri qyzyqtyrdy.
«Memleket áleýmettik áriptestik taraptarynyń biri bola otyryp, barynsha qoldaý kórsetip, onyń ishinde járdemaqy mólsherin ulǵaıtýǵa tıis. Meniń saılaýaldy baǵdarlamamda ulttyq zeınetaqy júıesin jańǵyrtý jeke tarmaq retinde kórsetilgen. Men áıelderdiń zeınetke shyǵý jasyn olardyń ál-aýqatyn nasharlatpaı tómendetýdi, aýyr, zııandy jáne qaýipti jumystarmen aınalysatyn qyzmetkerlerdiń erte zeınetke shyǵý máselesin sheshýdi usynamyn», dedi M.Qajyken.
