Medıasııa búginde qoǵamnyń barlyq salasynda qyzmet atqarady. Tipti otbasylyq máselelerdi erli-zaıyptylar ózara sheshe almasa, medıatorlar kómekke keledi. Parlament Senatynyń depýtaty Lázzat Súleımenniń basqarýymen ótken jıynda medıasııa ınstıtýtynyń jaı-kúıi, onyń qylmystyq isterde paıdalanylýy, arnaıy kabınetterdiń bilim mekemelerinde ashylýy, medıasııa tájirıbesiniń medısınada qoldanylýy sekildi máseleler qaraldy. Ásirese mamandar eńbek daýlaryn sheshýde medıasııanyń róli erekshe ekenin aıtady.
Ádettegideı ár mekemede eńbek daýlary, jumysshylar arasynda túsinispeýshilik týyndaı qalsa, bul másele arnaıy komıssııada qaralady. Al medıasııa salasynyń sarapshylary «komıssııa músheleriniń eńbek daýlaryn sheshý tártibi, ádisteri jáne zańnamanyń mazmuny boıynsha quzyretteri tómen», deıdi. О́ıtkeni qazir eńbek daýlaryn qaraıtyn komıssııanyń biliktiligin rastaıtyn parametrler qarastyrylmaǵan. Osy oraıda, sarapshylar medıasııa mekemeleriniń kómektese alatynyn alǵa tartady.
«Medıasııanyń bitimgershilik komıssııadan aıyrmashylyǵy, medıator eki taraptyń múddesi úshin jumys isteıdi, taraptardyń rásimge qatysýyn qamtamasyz etetin beıtarap, quzyretti maman. Medıatordyń beıtaraptyǵyna teris áser etetin mán-jaılar bolsa, maman medıasııadan bas tartýǵa mindetti. Medıasııa – daýlardy sottan tys retteýdiń eń tıimdi joly. Bul rásim kezinde janjalǵa qatysýshy taraptar medıatordyń tájirıbesine, bilimi men daǵdysyna súıene otyryp, ózara tıimdi sheshimge óz betinshe kele alady. Daýdyń sheshilýi tolyǵymen taraptardyń ózderiniń erkine baılanysty», dedi «Ulttyq medıatorlar palatasy» QB Shyǵys Qazaqstan oblysy ókildiginiń dırektory Marıanna Dıachýk.
Sondaı-aq medıasııanyń artyqshylyǵy daýǵa qatysýshylardyń ýaqytyn, aqshasyn jáne emosıonaldyq kúshin únemdeıdi, rásimniń uıymdastyrylýy, erejeleri men mazmuny jeke belgilenedi. Dese de, taraptardyń biri memlekettik organ bolyp tabylatyn eńbek qatynastarynan týyndaıtyn daýlarǵa medıasııa qatyspaıdy. Sondaı-aq sybaılas jemqorlyq, qylmys jáne memlekettik qyzmet pen memlekettik basqarý múddelerine qarsy basqa da qylmystardy qamtıtyn qylmystyq ister boıynsha medıasııa rásimi qoldanylmaıdy.
Jıynda mamandar eńbek daýlaryn sheshýdegi medıasııanyń qatysýyn qamtamasyz etýde birneshe usynys jasady. «Qyzmetkerdiń daýdy sheshýge qatysty túsirgen shaǵymǵa baılanysty shekteýler bar. Osy oraıda Eńbek kodeksine birinshi satydaǵy tatýlastyrý komıssııasyna ǵana emes, kásibı medıatorǵa da balamaly negizde júginý quqyǵyn beretin normaǵa tolyqtyrý engizý usynylady», dedi medıator M.Dıachýk.
