Qorǵanys vedomstvosynyń basshysy qatysýshylardy Ulttyq mereke – Respýblıka kúnimen quttyqtady. Ol demokratııalyq áleýmettik quqyqtyq memleket qurýdy, táýelsiz damýdy, onyń aýmaǵynyń bólinbeıtindigi men qol suǵylmaıtyndyǵyn jarııalaǵan memlekettik egemendik týraly Deklarasııany qabyldaýdyń mańyzdy ekenin atap ótti.
Memlekettilikti nyǵaıtýǵa, jastardy áskerı-patrıottyq tárbıeleýge Qarýly Kúshter men bilim berý mekemeleri de óz úlesterin qosyp keledi. Elimizdiń Qorǵanys mınıstrligi men joǵary oqý oryndarynyń belgilengen merzimde qyzmet etken áskerı qyzmetshilerge tegin joǵary bilim alý múmkindigin berý jónindegi birlesken jobasy da áskerı qyzmettiń bedelin arttyrýǵa yqpal etetin bolady.
– Atalǵan bastamanyń jaqsy jaǵy jeterlik. Bul stýdenttik ortada patrıotızmdi nyǵaıtýǵa yqpal eteri anyq. Birinshiden, joǵary oqý oryndaryna ózderin jaqsy jaǵynan kórsetip, muqııat irikteýden ótkender keledi. Ekinshiden, oqý oryndaryna baratyndar – armııa mektebinen ótken jastar. Myqty, tózimdi, tártipti balalar stýdentterge batyldyq pen derbestiktiń úlgisi bolady, – dedi vedomstvo basshysy, general-polkovnık Rýslan Jaqsylyqov.
Elýden astam joǵary oqý ornynyń basshylary qol qoıǵan kelisimde yntymaqtastyq baǵyttary, sondaı-aq merzimdi áskerı qyzmet ótkergen adamdarǵa tegin bilim alý úshin jyl saıyn bólinetin oryndardyń sany aıqyndalǵan.
Kelisimder 2023 jyldan bastap kúshine enedi. Áskerde boryshyn ótkergen azamattarǵa bilim alý jeńildikterin berý áskerı qyzmetke degen yntany arttyrary sózsiz. Is-shara Qorǵanys mınıstrliginiń Ortalyq ansambli daıyndaǵan merekelik konsertpen aıaqtaldy.
