Medıa aptalyq aıasynda baspasóz ókilderi «Baspa BAQ transformasııasy» taqyrybynda ótken sessııada otandyq gazet-jýrnaldardyń keleshegine qatysty oı-pikirlerin ortaǵa saldy. Atalǵan jıyn barysynda Aqparat jáne qoǵamdyq damý mınıstrligi tarapynan baspasózdi qoldaý baǵytynda atqarylyp jatqan ilkimdi is-sharalar jóninde aıtyldy. Kópshilikti eleń etkizgeni – basylymdardy qosymsha qun salyǵynan bosatýdyń qarastyrylyp jatqany týraly jańalyq boldy. Sonymen qatar gazetti taratý isinde de kóptegen ıgi sharalar qolǵa alynbaq.
Jıyn moderatory – «National Geographic Qazaqstan» jýrnalynyń jaýapty redaktory Aıbyn Shaǵalaq sıfrlyq júıe damyǵan saıyn oqyrmany azaıyp bara jatqan gazet-jýrnaldar aqparat alańyndaǵy ornyn saqtap qalýy úshin qandaı qadamdar jasap jatyr degen suraqty ortaǵa tastady.
Bul rette «Jas qazaq» gazetiniń redaktory Sraıyl Smaıyl baspasózdiń ǵumyryn uzartý úshin naryqqa beıimdelip, tabys tabýdyń tyń tásilderin izdeý mańyzdy ekenin atap ótti. Búgingi kúni redaksııa gazetke oqyrman tartýmen qatar basylymnyń ınternet resýrsyn damytýǵa da aıryqsha nazar aýdaryp otyr. Budan bólek, prodıýserlik ortalyq arqyly shaǵyn fılmder túsirý de jolǵa qoıylǵan. Bul da gazet úshin qosymsha tabys ákelip otyrǵan joba.
– Osydan on jyl buryn qazaq gazetteri joıylady degen boljamdar jasalǵan. Biraq ýaqyttyń ózi kórsetip otyrǵandaı, joǵala qoıǵan joq. Qaryshtap damyǵan Japonııanyń ózinde qazir jastardy kitapqa jaqyndatý memlekettik turǵyda qolǵa alynyp jatyr. О́ıtkeni sıfrly tehnıka aldymen adam densaýlyǵyna zııan. Internet adamnyń oılanýyna múmkindik bermeıdi, jalqaýlyqqa jeteleıdi. Sonymen qatar áleýmettik jeli damyǵan saıyn saýatty jazatyndar qatary kemip ketti. Aldymen aqparatty saıtqa jedel ornalastyryp, sonan soń gazetke saraptap bersek, utarymyz kóp. Gazettegi saraptama, ocherk, esse, tolyq suhbattar básekelestikke tótep berýdiń basty quraly bolyp qala bermek. Jasyratyny joq, kóptegen ujym eń áýeli qarjylyq jaǵdaıdy sheshýge tyrysyp, sodan keıin ǵana gazettiń mazmunyna mán beredi. Oqyrmanǵa sapaly ónim usyný úshin jýrnalısterdiń kásibı biliktiligin arttyrýǵa, saraptamalyq maqalalarǵa basymdyq berýge basa nazar aýdarǵan jón, – deıdi Sraıyl Smaıyl.
«Egemen Qazaqstan» respýblıkalyq gazeti» JShS bas dırektorynyń orynbasary Qambar Ahmetov basylymdar áý basta jańa aqparattyq tehnologııalarǵa tosyrqaı qaraǵanyn aıtady. Dese de, ýaqyt óte kele jańashyldyqtan aınalyp ótý múmkin emes ekenine kóz jetip otyr.
– Osydan on shaqty jyl buryn dástúrli BAQ ókilderi jańa medıaǵa jatyrqaı qaraǵany ras. Biraq basylymdy saqtap qalý úshin jańashyldyq kóshinen qalmaý mańyzdy ekenin túsindi. Qazir basylymdardyń barlyǵy derlik jańa tehnologııalardyń kómegine súıenip, aqparat naryǵynda barynsha básekege qabiletti bolýǵa áreket etip jatyr. Dese de, bul úderis baıaý júrip jatqanyn atap ótken jón. О́z tájirıbemiz jaıly aıtar bolsaq, osydan 5-6 jyl buryn basshylyqtyń bastamasymen «Egemen Qazaqstan» gazetinde arnaıy strategııa qabyldanǵan bolatyn. Oǵan sáıkes, eń aldymen gazettiń mazmunyna ózgeris engizý, kúndelikti aqparattan góri taldaýǵa, saraptamaǵa basymdyq berý kózdeldi. Buǵan qosa basylym saıtyn qaıta quryp, derbes aqparattyq resýrs retinde damytý qarastyryldy. Sondaı-aq aqparatyq tapsyrys pen jarnamany tek gazetke ǵana emes, saıtqa da kóptep tartý mindeti belgilendi. Búginde bul baǵyttaǵy jumystar óz nátıjesin bergenin kórip otyrmyz. Qazir saıt oqyrmandary da artty, jarnama berýshiler de kóbeıgen, – deıdi Qambar Ahmetov.
Al «Argýmenty ı fakty» gazetiniń bas redaktory Evgenıı Grıýnberg «transformasııalaý kóshinen qalyp bara jatsaq ta, joǵaltqan túgimiz joq» degen pikirde.
– Qıyn-qystaý kezeńderde basylymnyń taralymy tómendegen joq. Iаǵnı transformasııalaýǵa basa nazar aýdarmasaq ta upaıymyz túgel. Keıde ınternet resýrstar taratqan aqparatqa qarap, jańashyldyqtyń ıgiligi sezilmeıtinin aıtqym keledi. Taqyryby «jer jarady», shyn máninde ilip alar eshteńe joq. Mundaı kezde tolyq zerttelgen maqala usynatyn basylymdardyń mártebesi joǵary ekenine eshkim shúbá keltire qoımas, – dedi E.Grıýnberg.
Jıynnyń qorytyndy sózin aıtqan Aqparat jáne qoǵamdyq damý mınıstrligi Aqparat komıtetiniń tóraǵasy Qanat Ysqaqov otandyq BAQ-ty qoldaý jumystary jalǵasa beretinin jetkizdi. Komıtet tóraǵasynyń aıtýynsha, qazirgi kúni mınıstrlik otandyq basylymdardy qosymsha qun salyǵynan bosatý máselesin qarastyryp jatyr. Sonymen qatar biraz jyldan beri kúrmeýi sheshilmegen másele – gazetterdi taratý isin jolǵa qoıý baǵytynda naqty is-sharalar qolǵa alynyp jatqan kórinedi.
