«Real» jeńimpazǵa tán oıyn kórsetti

Senbi kúni túnde Portýgalııanyń astanasy – Lıssabon qalasynda Ispanııa Madrıdiniń  «Real» jáne «Atletıko» komandalary Chempıondar lıgasynyń fınalynda kezdesip, bulardyń aldyńǵysy 4:1 etip utyp shyqty. Match kópshilik kútkendeı, «Realdyń» qaýyrt shabýyly­men bastaldy. Buǵan «Atletıko» tasqamal qorǵanysty uıym­das­tyra otyryp, oqta-tekte údere shabýyl jasaý taktıkasyn qarsy qoıdy. Túbinde osy tásil óziniń oń nátıjesin de berdi. Kezdesýdiń 36-mınýtynda buryshtamadan soqqy jasaǵan «matrasshylar» qaqpashy Iker Kasılıastyń alǵa shyǵyp ketkenin kezinde paıda­lanyp, esep ashty. «Real» oıyn­shylary aıyp alańynan shyǵarǵan dop qaıtadan keri keltirilgende, «Atletıkonyń» jartylaı qorǵaýshysy Dıego Godın ony basymen alystan uryp túsirdi. Osydan keıin «blankos» fýtbolshylary shabýyldy bu­rynǵydan beter kúsheıtti. Krıshtıaný Ronaldý bastaǵan realdyqtar alǵa qaraı órshelene umtyldy. Osyndaı ústin-ústine jasalǵan joıqyn shabýyl negizgi ýaqytqa qosylǵan 3-mınýtta ǵana óz nátıjesin berdi. Áýeli Lýka Modrıch buryshtama dobyn jetkizdi. Ony Serhıo Ramos basymen uryp, qaqpashy Tıbo Kýrtýanyń tý syrtynan bir-aq shyǵardy – 1:1! Osydan keıin qosymsha eki taımǵa kezek keldi. Ol jurt­shylyq kútken ssenarıı boıynsha órbidi. Sońǵy goldan úlken qýat alǵan Karlo Anche­lottıdiń jigitteri ta­ǵy da alǵa qaraı jóńkile shapty. Bul joly olar atqanyn qur jibergen joq. Sóıtip, Garet Beıl (110), Mar­selo (118), Krıshtıaný Ro­nal­dý (120-penaltı) sekildi oıyn­­shy­lar soqqan goldardyń ar­qa­syn­da «Real» esepti 4:1-ge jet­ki­zip, bir-aq toqtady. Rýslan IGILIK.