Qaraǵandyǵa qarasty Orynbaı aýyly mańyndaǵy ǵarysh kemesiniń bólshegi qulaǵan. Ony aýyl turǵyndary vıdeoǵa túsirip, áleýmettik jelide jarııalady. Turǵyndar kemeniń synyǵy azamattardyń densaýlyǵy men qorshaǵan ortaǵa qaýip tóndirýi múmkin dep qaýiptenip otyr.
Jańaarqa aýdanynyń ákimdigi jaǵdaıǵa qatysty pikir bildirdi. Vedomstvo qulaǵan fragment «Progress MS-21» ǵarysh kemesine tıesili ekenin habarlady.
«Bul «Progress MS-21» júk kemesiniń fragmenti. Ol Orynbaı eldi mekeninen 25 shaqyrym jerge qulaǵan. Jaqyn mańdaǵy qystaýlardyń turǵyndary evakýasııalandy. Orynbaı aýylynyń turǵyndaryn kóshirgen joqpyz. «Roskosmos» mamandary ǵarysh kemesiniń ushý kúni men ýaqytyn aldyn ala bilip, fragmenttiń qulaǵan jerin anyqtaǵan. Olar bul jerdi kúzetetin arnaıy jedel áreket etý tobyn qurdy. Ǵarysh apparatynyń alǵashqy fragmentteri alyp tastaldy, olar qaýip tóndirmeıdi», dedi baspasóz qyzmeti ókilderi.
